پەرلەمان کوردستان ئاشکرای ئەنجامەیل نوویگ لە دانوستانەگان بەغداد کەێد
شەفەق نیوز/هێمن هەورامی جیگر سەرۆک پەرلەمان کوردستان، ئمڕوو چوارشەممە، راگەیان شاند حکومەت هەرێم ک ئیسە سەردان بەغداد پایتەخت کەێد هیچ دەسپیچگیگ نەیشتە نوای حکومەت بەغداد و پەرلەمان عراق تا بەش هەرێم لە بوودجەی ساڵ ٢٠٢١ رەوانەی هەرێم نەکەێد.
هەورامی لە وتاریگ ئەرا رووژنامەنووسەیل و پەیامنێر ئاژانس شەفەق نیوز لەناویان بوی وت: ئیمە هایمنە پەیوەندی وەردەوامیگ وەگەرد شاند هەرێم ک ئیسە سەردان بەغداد کەێد، وتیش؛ فرەی کۆبونەوەگان شاندەگە وەگەرد دەسەی دارایی لە پەرلەمان کریەن.
هەمیش وت: هەرێم کوردستان پشتگیری رەشنووس یاسای بوودجەگە کەێد حکومەت فیدڕاڵی ئەرا ئەنجومەن نۆێنەران رەوانەی کردگە، و تەقەلایلیگ لە ئەنجومەن نۆێنەران هەس ئەرا دەسکاری و راسەوکردن ئەو رەشنووسە، ئەراوە شاند هەرێم روی کردە بەغداد.
هەورامی ئاماژە کرد ک شاندەگە لە ناو کۆبونەوەگانی وەگەرد دەسەس دارایی گرفتەیل گەورایگ لەبان مادەی دەهەم لە رەشنووس پڕۆژەی یاساگە نشان نەیا، بەڵکم ناکۆکیەگە هالە مادەی ١١ ک پەیوەندی وە وەدەس داین نەفت دیرێد.
وتیش؛ ئەندامەیل شاند حکومەت هەرێم، دوێەکە راگەیانن ک هیچ دەسپیچگیگ لەلای حکومەت فیدڕاڵی و ئەنجومەن نۆێنەران نەمەن تا بەش هەرێم لە بوودجەگە رەوانە نەکەن، وتیش؛ یا هەرێم ٢٥٠ هەزار بەرمیل نەفت رووژانە بیەێدە کۆمپانیای سۆمو، یا بەشیگ لە داهاتەگان لە فرووشتن خام رەوانە بکەێد.
