رزەیل خانەنشین و پیرەیل لە وەردەم بانکەیل سلێمانی لەوەر دیرکەفتن مووچە درەیژەو بوون.. وینە
شەفەق نیوز/ شار سلێمانی، ئمڕوو یەکشەممە، قەرەباڵغ گەورەیگ لەوەردەم بانکەیل حکومەتی وەخوەی دی، لەوەر دیرکەفتن خەرج مووچەیل، کە خانەنشینەیل و گەورە تەمەنەیل ناچار بوین ئەرا ساعەتەیل فرەیگ لە رزەیل درویژیگ وەچەوەڕی مووچەیان بووسیەن.
شمارەیل گەورەیگ لە خەڵکەگە، فرەیان خانەنشین و پیرەیل بوین، هەرلە شەوەکی زویەو، لە وەردەم بڕیگ لە بانکەیل حکومەتی لە سلێمانی گردەو بوین، لەناو بیزاری و تویڕە لەوەر دیرکەفتن خەرج مووچەیل.
یەکیگ لە خانەنشینەیل، حاجی محمد عەلی (٧٠ ساڵە) ئەرا پەیامنێر ئاژانس شەفەق نیوز وت: لە شەفەقەو ئیمە هایمنە ئیرا، بەشیگ لەلییان زیان لە بیماریەیل درویژماوە دیرن، و شوین نیشتن یا چەتریگ نییە تا لە کەشوهەوا مقیەتیمان بکەێد، نیەزانیمن ئەرا گشت مانگیگ ئی گیچەڵە دووارەو بوود.
لەلای خوەییش، خانم فاتمە کەریم (٦٥ ساڵە) مە بیوەژنە و وەتەواوی پشت وە مووچەی خانەنشینی بەسێد، لە قسەیلی ئەرا ئاژانس شەفەق نیوز وت: دیرکەفتن مووچەیلمان ژیانمان سەختترەو کەێد، تا چەن رووژیگ تیەیمن ئەرا بانک وەبیخود، کە زیان رووژانەمان زیایەو کەێد.
سەرچەوەیلیگ لە بانکەیل حکومەتی، وتن؛ دیرکەفتن خەرج مووچەیل گلەو خوەێد ئەرا دویاکەفتن هەواڵەکردن پویل لە لایەنەیل فیدڕاڵی، کە زووریگ بیوینە هاوردە مل فەرمانبەرەیل و بانکەیل.
قەیران دیرکەفتن خەرج مووچەیل بویەسە سەختییگ مانگانە لەڕوی سەدان هاوڵاتی لە سلێمانی، وەتایبەت خانەنشین و گەورە تەمەنەیل.
وەگەرد وەردەوامی ئی قەیرانە، داواکاری خەڵک زیایەو بوود ئەرا پەیاکردن چارەسەریەیل ریشەیی ونەهیشتن دووارەبوینی، ئەرا مسۆگەرکردن وەرگردن شایستەیلیان لە وەخت خوەی.
گیچەڵ دیرکەفتن خەرج مووچەیل لە سلێمانی جویر یەکیگ لەو سەختیەیلە دانریەێد کە یە چەن ساڵیگە کەفێدە وەر خەڵک، لە ئەنجام ئاڵووزەیل هەواڵەکردن پویل لە حکومەت فیدراڵی ئەرا هەرێم کوردستان.
ئی دیرکەفتنە بویە مدوو چەن ناڕازییگ و زیاربوین زوور وەبان بانکەیل حکومەتی لە جیوەجیکردن داوایل خەرجکردن لەسای کەمی داهاتەیل.
