گردەوبوین ناڕەزایی لە وەردەم نوینەرایەتی نەتەوە یەکگرتگەیل لە سلێمانی..وینە
شەفەق نیوز/ بڕیگ لە چالاکوانەیل مەدەنی لە سلێمانی، ئمڕوو یەکشەممە، وسیانیگ ناڕەزایی لە وەردەم بارەگای نەتەوە یەکگرتگەیل لە پارێزگاگە ڕێک خستن، لەبان پەلامارەیل سوپای تورکیا.
ئاژانس شەفەق نیوز ئاگادار بوی ک گردەوبوینەگە وە ناڕەزایی لەبان پەلامار کیمیایی لەلایەن سوپای تورکیا لەبان پەکەکە لە هەرێم کوردستان بویە، ئەو کارە ک وەرجەیە وەزارەت وەرگری تورکیا رەتی کرد.
لەی باوەتە، نەورەز فازڵ چالاکوان مەدەنی لە کۆنگرەیگ رووژنامەوانی ئاژانس شەفەق نیوز ئامادەی بوی وت: دەسدرویژی وەردەوام تورکیا لەبان زەوی و ناوچەیل هەرێم کوردستان بویە هوکار زەرەدەیل گەورەیگ ئەرا هاووڵاتیەیل و ژینگە، ک درویژە وە زەرەدەیل رژیم سەدام حسێن لەناوچەی هەڵبجە دەێد.
فازڵ داوا لە نەتەوە یەکگرتگەیل و ریخریاگ قەیەغەکردن وەکارهاوردن چەک کیمیایی کرد وە کوتپڕ دەسوەردان بکەن، ئەرا نواگردن ئەو کارەساتەیل مرۆییە، و سەردان ئەو ناوچەیلە بکەن ک رووژانە کەفنە ژیر ئیجویر دەسدرویژییگ.
چالاکوانەیل و روشنهویرەیل وکەسایەتیەیلیگ تەقەلا دان یاداشت ناڕەزایی بیەنە دەس نوینەر نەتەوە یەکگرتگەیل، باوجی وەرپرسەیل نەتەوە یەکگرتگەیل ڕازی نەوین ئەو یاداشتە بوەن، وەبی ئاشکراکردن هوکارەیل.
جی باسە ک نەتەوە یەکگرتگەیل، لە دویەکەو مووڵەت وەی وسیانە دایە، و چالاکوانەیل بڕیار دان ئەو یاداشتە بکەنە قەی دەروازەی نەتەوە یەکگرتگەیل لە سلێمانی.
