گردەوبوینیگ ناڕەزایی لە مەنەلی
شەفەق نیوز/ دەیان لە دانیشتوەیل ناحیەی مەنەلی، ئمڕوو یەکشەممە، گردەوبوینیگ رێکخستن ئەرا داواکاری لە جیوەجیکردن بڕیگ باوەت دویاخریاگ ئەرا چەنی ساڵیگە.
چالاکوان ئەحمەد مەندەلاوی یەکیگە لە بەشدارەیل گردەوبوینەکە ئەرا ئاژانس شەفەق نیوز وت: دەیان لە هاووڵاتیەگان لە وەردەم بینای وەڕێۆبەرایەتی ناحیەگە گردەوبوین ئەرا داواکاری لە جیوەجیکردن بڕیگ شایستەیل یاسایی ک جیوەجی نەکریانە، هەرچەن حکومەتەیل وەرین و حکومەت فیدڕاڵی پەیامانیان دانە، جوور داناین وەڕێوبەر ناحیەگە و یەکلاکردنەوەی پۆستەگە ک لەوەخت رووداوەیل ریفراندۆم ساڵ ٢٠١٧ تا ئیسە وەجینشینی وەڕیەو چوود، و پویچەڵکردن بڕیارەیل ئەنجومەن فەرماندەی شۆڕش ناوبەنام لە ( ٤٥٩، ٦١٧) ک مێژوو و ئاسەوار مەنەلی سڕیەو و لە قزایگ ئاڵشتی کردە ناحیە، و هەڵگردن دەسوەبانان دارایی و زەویەگانی وهەمیش زویکردن لە جیوەجیکردن خەسەخانەی ١٠٠ شەوخەفی ک وەرجەیە وەزارەت تەندروسی تەرخانی کردگە، و جیوەجیکردن پڕۆژەی بەسانن کەهربایی لە هێڵ ٣٢ لە بەلەدرووز تا مەنەلی، وتەخانکردن بەشیگ لە ۆ
داهاتەیل مەرز مەنەلی ئەرا ئاوەدانکردن مەنەلی و دەوگردی.
مەندەلاوی دووپاتکرد ک گردەوبوینەگە هەمیش داوای دانان ویستگەی شیرینکردن ئاو خواردن کرد لەبان کۆمەڵەی ئاو مەنەلی، و وەکارخسان ٥٠ چاڵ نەفتی ک لە ساڵەیل دریژیک وسیانە و وەپشتگووش خریانە، و گردنەوەی کەڕەکەیل قەلم حاج و مکبرات وەگەرد سنوور مەنەلی تا شایستەیل خزمەتگوزاری وەریان بگرن، و هەمیش قلیکردن جادە سەرەکیەگان و پەلیەگان و رووشناکردنیان و دروسکردن تووڕ ئاو تەندروسی تەواوەتییگ وەگەرد هاوردنەوەی گشت بینا حکومەتیەگان ک کەفتنە وەر بمباران و خراوکردن ئەرا خزمەتگوزاری.
