گردەوبوینیگ لە هەولێر ئەرا ناڕەزایی لەبان وسیان پڕۆژەیگ نیشتەجیی
شەفەق نیوز/ شمارەیگ لە خاوەن شوقە وماڵەیل لە یەکیگ لە پڕۆژەیل نیشتەجیی لە شار هەولێر، ئمڕوو شەممە، گردەو بوین ئەرا ناڕەزایی لەبان وسیان پڕۆژەگە.
هاووڵاتی ئەیاد سیروان رێکخەر وسیانە ناڕەزاییەگە ئەرا ئاژانس شەفەق نیوز وت: تا ئیسە ١٠ هەزار دۆلار دامەسە کۆمپانیای شوکە ڤار، ئەرا سەنین شوقەیگ لە پڕۆژەی ڤار پارک لەبان ری سەیرانگای سەڵاحەدین لە هەولێر، دیاری کرد ک باوجی یە زیاتر لە مانگیگە پڕۆژەگە وەناکاو وسیا.
هاووڵاتی کارزان عەلی ک لە وسیانە ناڕەزاییەگە بەشداری کرد، ئەرا ئاژانس شەفەق نیوز وت: هەناێ پڕۆپاگەندە لەو پڕۆژە کردن پەیمان وەپیمان دان ک پڕۆژەگە ئەوپەڕی وەماوەی سێ ساڵ تەواو بوود، و پویلەگە وە قیست بیریەێد، دیاری کرد ک خوەی چوار شوقە سەن و ٤٠ هەزار دۆلار دا کۆمپانیاگە، و چەن جاریگ وەگەرد ئیدارەی پڕۆژەگە پەیوەندی کرد ک پەیمان وە دووارە کارکردن لەی رووژەیلە دا، وەبی ئەوەگ قسەی خوەی بارێدە جی.
ناڕەزایلە داوا لە حکومەت هەرێم کوردستان کرد دەس بیەێدەوەر تا بڕەسێدە بندروس وسیان ئێ پڕۆژە لەلاین کۆمپانیەگە.
