گەردینیگ لە بازاڕەیل سلێمانی وەرجە مەوقەی دەمەوکردن.. وینە
شەفەق نیوز/ سلێمانی لە وەخت دامزرانی هەر شۊنیگ ئەرا بازرگانی بۊە، ئەوەیش لە جۊلەی فرووشتن و سەنین دیار دا، و بازاڕەیلی بۊنە زیاترین شۊنەیل قەرەباڵغی، و لە مانگ رەمەزان قەرەباڵغی بان دوکانەیل بازرگانی زیایترین سیمایل دڵگیرە لە بازاڕەیل شارەگە.
پڕبۊن جادەیلە لە قەواسەی کاسبکارەیل
ئەحمەد، کەسیگە گشت ئیوارانیگ تیەێدە بازاڕ، ئۊشێد بازاڕەگە لە مانگ رەمەزان گورجی وەخوەی دۊنێد، و قەرەباڵغی هالە جادەی سەروکی شارەگە، و ئەرا ئاژانس شەفەق نیوز ئۊشێد؛ ئی جادە لە مانگ رەمەزان سیمایگ تایبەت وەخوەی هەڵگرێد، ئەوەیش وە دروسکردن قەواسەیگ وە پەڕوو چادرەیل تا ریوارەیل بخەێدە ژیر سا، و چشتەیلیش لە خوەر مقەیتی بکەێد.
قەرەباڵغی وری بەسیان وەرجە مەوقەی دەمەوکردن
عومەر، هاوڵاتییگە خەڵک سلێمانی، ئۊشێد: قەرەباڵغی بازاڕ و جادەیلە لەی مانگە بۊسە سیمایگ بیزارکەر، ک ریەیل هاتوچو بەسیەن و فرەجار تەنیا وەختەگەی وە گەردین ناو بازاڕ بەێدە سەر.
عومەر ئەرا ئاژانس شەفەق نیوز ئۊشێد: کارەگە وسیانیگ لەلیمان خوازێد و تەقەلایگ ئەرا پەیاکردن چارەیگ، و دووپات کرد ک خوازین لە مانگ رەمەزان ئەوەسە دڵەیل ئەرا کارپاکی ئامادە بکەیمن، باوجی لە مانگیگ ئەرا پەرستی و دژایەتی نەفس و هەسکردن وە ئووەکان بۊە مانگیگ ئەرا خەرجکردن. ه
ەوراز، خانمیگە لەناو بازاڕەگە چشت سینێد، ئۊشێد: کارەگە قەرەباڵغی لە جادەیلە دروس کەێد و فرەبۊن دەسەفرووشەیل لەبان جادەیلە ریەگە تەنگەو کەێد، و دیاری کرد ک فرە لە بازرگانەیل چشتەیلی لەناو دوکانەگە درارێد و خەێدەی وەردەم دوکانەگە و ری لە ریوارەیل بڕێد.
مانگ پیرووز وە شیوەیگ کۆمەڵایەتی پووشیەێد
پەیامنێر ئاژانس شەفەق نيوز ک گەردیە ناو بازاڕەیل شارەگە، ئۊشێد: شیوەی ئەو بازاڕەیلە لە مانگ رەمەزان ئاڵشت بوود، و رەفتارەیل جیاوازیگ لەی مانگ پیرووزە بڵاو بوود، لەلیان رەنگەیل خوەراک، ک لەماڵ ئامادە کریەن، و هەمیش چینەیل شیرینی، و مەوقەیل نزیک دەمەوکردن بوودە ماوەی قەرەباڵغی و سەنین خەسیگ، و وەگەرد نزیکەوبۊن جەژنیش خەستررو بوود.
ئەرسەلان، هاووڵاتییگە خەڵک سلێمانی، ئۊشێد: کەشوهەوای رەمەزان هیلێد بازاڕەیلە وە رەفتاریگ کۆمەڵایەتی بپووشیەن، و خوەشخووی بکەفێدە ناو مەردم، و بازاڕەیلیش بوونە چینیگ لە چەوپیکەفتن ئەرا مەردمەگە جۊر دەرفەتیگ ئەرا نزیکەوبۊن و یەکناسین.
رزەیل درۊژیگ ئەرا ئاو مەیوژ
هاتی فرەترین سیمایل رەمەزان ک لە عراق و هەرێم کوردستان باوە، خوەی وە رزار وسیان رووژەگرەیلە لەوەردەم دوکانەیل ئاو مەیوژ.
رازان ماجد، ئاو میوە فرووشێد، ئۊشێد: ئاو مەیوژ ها بان لیست خوان رەمەزان، ک وەبی ئەوە تەواو نیەووود، ک دۊای ساعەتەیل درۊژیگ لە رووژگ و نەخواردن و نەنووشین، شایەت شەربەت میوژ لە ئاو فرەتر بنووشیەێد.
دۊادۊای رووژەگە بوودە ماراسۆنیگ راسی
ژیان لە سلێمانی، لە ساعەتە دۊاینەیل رووژەگە لە رەمەزان، بوودە ماراسۆنیگ راسی، ک جادەیلە گورجییگ جۊلەکردن وەخوەیان دۊنن، گشتی خوازێد زۊ بڕەسێد، وە ئومید دابینکردن گشت خوازینەیل خوان دەمەوکردن وەی خولەکەیل کەمە.
ئینتیسار، خانمیگە خەڵک شارەگە ئۊشێد: جادە و دوڕیانە گشتیەیل وەرجە بانگ ئیوارە پڕ لە ماشین و مەردم بوون، و وەگەرد نزیکەوبۊن خوەرئاوابۊن زیاترەو بوود.
ئینتیسار هەمیش ئۊشێد: دۊاترین ساعەت لە رووژگ هیلێد ریوارەیل و خاوەن دوکانەیل بکەفنە رتمیگ وە پەلە، ک بازرگانەگە خوازئد چشتەیلی وەرجە وسیان جۊلەگە بفرووشێد، و بسینەگە لە چرکە دۊاینەیل خوازێد چشتەیلی بسینێد.
قایمقام سلێمانی: بازاڕەیل وەرینمایلە پابەندن
لە چین حکومەتی، قایمقام سلێمانی دووپات لە پابەندی فرەی بازاڕەیل شارەگە وە رینمایل ئیدارەی پارێزگاگە کەێد.
قایمقام ئاوات محمد ئەرا ئاژانس شەفەق نیوز ئۊشێد: وەگورەی راپۆرتەیل ک لەلایەن دەسەیل هاوبەش رەسینە؛ فرەی بازاڕەێل پاباندە وە شیوەی خاسیگ وە رینمایل دەسەیل هاوبەش ک تایبەتە وە مانگ رەمەزان، و لە خود وەختەگە ئەرزشدار پابەندبۊن هاووڵاتەیل کرد وە رینمایل حکومەتی ک کەفێدە خزمەت کۆمەڵگا لەی مانگ پیرووزە.
