ئەرا یەکەمین جارە لە عراق.. هەرێم کوردستان دەسکەێدە سیستەم مووڵەت رانندەیی ئەلیکترۆنی
شەفەق نیوز/ وەڕێەوبەرایەتی هاتوچو گشتی لە پارێزگای هەولێر پایتەخت هەرێم کوردستان، ئمڕوو چوارشەممە، دەسکردە سیستەم مووڵەتداین رانندەی ئەلیکترۆنی ئەرا رانندەی ماشینەیل.
رسوومەیل دەسکردن وە پڕۆژەگە ک یەکەمە لەی چینە لەئاست کوردستان و ئەو ناوچە و شارەیل عراق، وەئامادەبوین مەسرور بارزانی سەرۆک حکومەت هەرێم کوردستان وەڕیەو چگ.
وەڕیەوبەرایەتیەگە یەکەمین کارت مووڵەت رانندەیی دادە سەرۆک حکومەت هەرێم کوردستان ک لە وتارەگەی لە پەراویز سەرپەرشتیاریی لەبان دەسکردن وە پڕۆژەگە وت: ئمڕوو هاتیمنە ئێرا تا کۆتایی وە رۆتینە باریمن ک لە فەرمانگە و دامودەزگایل حکومەتی هەس، لەناویان ئی دامەزراوەسە، و دەسکردن وە سیستەم ئەلیکترۆنی خزمەت هاووڵاتییەیل وەشیوەیگ خاستر کەێد، و رۆتین لە فەرمانگەیل کەمەو کەێد.
مەسرور بارزانی سوپاس لە کادرەیل وەڕێەوبەرایەتیەگە کرد ئەرا دەرکردن مووڵەت رانندەیی تایبەت وە سیستەمە نووەگە.
سیستەم رانندەیی ئەلیکترۆنی سیستەمیگە ئەرا یەکەمین جارە لە هەرێم کوردستان جیوەجی کریەێد، و لەناوی پشت وە دەرکردن مووڵەت وە شیوەی ئەلیکترۆنی ئەوەیش وەخاتر ئاسانکردن لەبان هاوولاَتییەیل و کەمەوکردن رۆتین لە فەرمانگەیل.
