رینماییگ حکومی ئەرا ئاسانکاری کار دەسەی تایبەت وە پاڵپشتیکردن کوردە فەیلیەیل

شەفەق نیوز- بەغداد

ئەمینداریەتی گشتی ئەنجومەن وەزیرەیل، ئمڕوو دووشەممە، رینمایی دا وە وەزارەتەیل و لایەنەیل نەوەسریاگ وە وەزارەت و گشت پارێزگایەیل، وە ئاسانکاریکردن و پاڵپشتیکردن کار دەسەی تایبەت ئەرا لاوردن شوینەوارە بەدەیل لەبان کوردە فەیلییەیل.

ئەمینداریەتیەگە لە بەیاننامەیگ رەسیەسە ئاژانس شەفەق نیوز، وت، کە "رینماییەگە لەباوەت ئاسانکاریکردن ئەرک دەسە پێکهاتگەس وەپەی فەرمان دیوانی (80 ئەرا ساڵ 2026)، و پاڵپشتیکردن کارەیلی، لە چوارچیوەی وەدۊاکەفتن و جیوەجیکردن پەیمان حکومەت عراقی و بەیاننامە فەرمییەگەی پەیوەندیدار وە لاوردن شوینەوارە بەدەیل لەبان کوردە فەیلیەیل، کە دەرچگە وەپەی بڕیار ئەنجومەن وەزیرەیل وەرین (426 ئەرا ساڵ 2010)".

 فەرمانگەی کاروبار ئەنجومەن وەزیرەیل و دەسەیل دیاری کرد کە "فەرمانە دیوانییەگە هەڵوەشانیەسەو فەرمان دیوانی ژمارە (33 ئەرا ساڵ 2019)، و وەپەی ئەوەیش دەسەیگ دروس کریاگە وە سەرۆکایەتی وەزیر داد و ئەندامیەتی نۊنەرەیل لە وەزارەتەیل دەیشت و ناوخۆ و دارایی و کووچ و کووچبەرەیل، و دەسەی داوایەیل موڵکایەتی، لەشان ئەندامیگ وەدۊاکەفتی و بڕیاردەریگ سەرپەرشتیار و هەماهەنگکاریگ جیوەجیکار لە ئەمینداریەتی گشتی ئەنجومەن وەزیرەیل".

وتیش کە "دەسەگە ئەرکەیل وەدۊاکەفتن جیوەجیکردن بڕیار و رێنماییە حکومییە پەیوەندیدارەیل وەی باوەتە گرێدە دەس، و دانان پلان و بەرنامە و ریکارە پێویستەیل ئەرا چارەسەرکردن کیشەیل کوردە فەیلییەیل، و پێشنیارکردن تەرخانکردنە داراییەیل و یاسادانانە پێویستەیل، لەشان رێکخستن چالاکی و کارە تایبەتەیل وە یایهاوردن مەزڵوومییەتیان و دەرخستن دەسکەفتە حکومییەیل لەی دۆسیە".

 وتیش کرد کە فەرمانە دیوانییەگە دەسەڵات وە دەسەگە داگە ئەرا پشت بەسین وە تەقەلا و توانایەیل لایەنە حکومی و نیشتمانی و کۆمەڵایەتی و ناودەوڵەتییەیل، و میوانداریکردنیان لە گردەوبوینەیلی وە شیوەیگ کە دەسمیەتی بەێد لە تەواوکردن ئەو ئەرکەیلە کە وەپی دریانە.