ھەرێم کوردستان ئەرا دابینکردن مووچەی مانگ ئاب دەسپاچەی کەمیی دارایی بوود

 شەفەق نیوز/ سەرچەوەیگ ئاگادار، ئمڕوو دووشەممە، راگەیان کە هەرێم کوردستان  998 ملیار دینار عراقی خوازێد ئەرا دابینکردن مووچەی مانگ ئاب گوزەشتە، یەیش لەوەر رووشنایی وەردەوامی قەیران دارایی کە لە ئەنجام دویاکەفتن کلکردن بەش دارایی لە حکومەت فیدراڵی لە بەغداو دروس بویە.

 سەرچەوەگە ئەرا بە ئاژانس شەفەق نیوز وت: "دویەکە یەکشەممە، بەغدا بڕ 572 ملیار دینار ئەرا هەرێم کوردستان کلکرد، لە وەرانوەر 183 ملیار دینار لە مووچەی مانگە مەنیەسەو".

 وتیش: "هیمان کەمیی 243 ملیار دینار هەس ئەرا تەواوکردن مووچە".

 وەگورەی  سەرچەوەگە، قەیران مووچەی فەرمانبەرەیل هەرێم کوردستان وە یەکیگ لە باوەتە ناسکەیل پەیوەندی دارایی ناوەین هەولێر و بەغدا دانریەێد وەگەرد ئەو رێککەفن وەرینە وە ئامانج ڕێکخستن کلکردن بودجەی فیدراڵی ئەرا هەرێم، و دویاکەفتنی دووبارە لەلایەن حکومەت ناوەندی بویە مدوو دروسبوین بۆشایی دارایی زیاتر، یەیش کاریگەری فرەیگ لەبان توانای حکومەت هەرێم داشت ئەرا بەشەوکردن مووچە لە وەخت خوەی.

 ئی قەیرانە سەدان هەزار فەرمانبەر کەرت گشتی لە هەرێم گرێدەو، کە وە پلەی یەکەم پشت وەو مووچە بەسن ئەرا خوازینەیل  سەرەتایی.

خەرجکردن ناڕێک  مووچەی فەرمانبەرەیل ززور وەبان حکومەت کوردستان زیای کردگە، کە لە ماوەیل گوزەشتە ناچاربوی ریکارەیلیگ جویر کەمکردنە یا دویاخستن مووچە وەجی بارێد.

 لە قسەیان ئەرا پەیامنێر ئاژانس شەفەق نیوز، شمارەیگ فەرمانبەرەیل کەرت گشتی لە سلێمانی ناڕەزایی خوەیان لە کاریگەری دویاکەفتن خەرج مووچە وەبان رەوشەیل ژیانیان نشان دان. 

دڵشاد عومەر، مامووستا لە مەکتەو حکومی لە سلێمانی وت: دویاکەفتن مووچە کاریگەری وەبان توانای ئیمە داشتیە لە دابینکردن خوازینەیل رووژانەمان، کە دی نیتوەنم خەرجییەیل ژیان بیەم و نەیش کرا لە مەوقەی خوەی بیەم، رەوش ئابووریش گەنترەو بوود وەل رەدبوین هەر مانگیگ وەبی ئەوەگ مووچە  لە وەخت خوەی باێد."

 لەلای خوەییش، کارمەنیگ ترەک کەرت تەندروسی کە ناو خوەی ئاشکرا نیەکەێد، باس ئەو سەختی گەورە کرد کە کەفێدە نوای و ئویشێد: “ئیمە ناچاریمن قەرز لە کەسوکارەیل یا بانکەیل بکەیمن تا خوازینەیل سەرەتایی باریمن دویاکەفتن وەردەوام خەرجکردن مووچە هیشت فرە لە ئیمە بکەفێدە رووژەیل سەختیگ.

 لەباوەت کاریگەری دویاکەفتن مووچە لەبان جویلەی بازاڕ، ئیبراهیم ئەحمەد، خاوەن فرووشگایگ خوەراک لە سلێمانی وت: لە سەرەتای قەیران مووچە جویلەی بازاڕ وەشیوەیگ وەرچەو کەنوو بویە، فرە لە بسینەیل خوەیان وە سەنین قیست یا داوا دویاخستن گیر هاوردنە تا وەختیگ مووچە باێد”.

 قەیران مووچە ساڵانیگە وە پەرەسەنین گرژییە دارایی و سیاسییەیل ناوەین هەولێر و بەغدا دەسوەپی کردگە، کە حکومەت هەرێم بیجگە لە داهاتە ناوخۆییەیل، وە تایبەتی لە نەفت پشتی وە کلکردن دارایی لە بەغداو بەساس،  بەڵام ئی کلکردنە وەشیوەیگ ڕێکوپێک نەوی، یەیش بویە مدوو کەڵەکەبوین باج دارایی و دویاکەفتن خەرج مووچە، وەتایبەتی وەل داوەزیان نرخ نەفت و زیایبوین خەرجییەیل حکومەت.

 وەبی چارەسەرییگ ئاشکرا لەماوەیگ نزیک، قەیران مووچە جویر یەکیگ لە سەختیە گەورەیل وەردەم حکومەت هەرێم مینێد، ەەتایبەتی لەژیر رووشنایی رەوشەیل سەخت ئابووری و کەمەوبوین سەرچەوە داراییە وەردەسەیل.