پەیکەر '' داڵگ شەهیدان" دانریەێدە ناو بینای پەرلەمان کوردستان

شەفەق نیوز/ سەرۆکایەتی پەرلەمان کوردستان، ئمڕوو چوارشەممە، پەیکەریگ لە ناو بیناگەی دانا، ئەرا ئەو ژنە ک بویە سومبلیگ ئەرا قوربانیداین لە جەنگەگە دژوە ریخریاگ داعش، ک مەسعود بارزانی سەکردەی کورد سەرۆک پارت دیموکڕات کوردستان ناوی نا: داڵگ شەهیدان. کوڕەگەی ک لە رسومەگە ئامادەبوی، ئەرا ئاژانس شەفەق نیوز وت: ئیمە جوور خیزان دایە عایشە ئامادەیمن ئەرا قوربانی وەخوینمان، هەکاتی کەسەیل خیزانەگەم ک خوینیان ئەرا کوردستان پێشکەشکردن ، وتیش؛ دایە عایشە جوور داڵگیگ ئەرا گشت شەهیدەیل کوردستان بوی. لەلای خوەییش هێمن هەورامی ئەندام دەزگای سەرۆکایەتی هەرێم کوردستان وت: لەناو دانیشتنیگ بویمن هەنای وەرجە ماوەیگ خەوەردارمان کردن وەمردن دایە عایشە، و لەو وەختە وەگەرد سەرۆکایەتی پەرلەمان پرسەو سەرەخوەشی پەرلەمان لە خیزانەگی کردیمن، وهویرەو کردیمن ک دایە عایشە ک سێ لە کوڕەگانی گیانیان پێشکەش وکوردستان کرد ، بایەسە وێنەی یا پەیکەریگی لە پەرلەمان بوود. هەورامی وتیش: قوربانیەگان دایە عایشە داوا لەلیمان کەن وە یەکێتی ماڵ کورد، وناکۆکیە حزبیەگان وئایدۆڵۆجیەگان بخەیمنە کنار، چوونکە کوردستان هالە نوای مەترسیەیلیگ لە گشت لاگان. لە رووژ دووشەممە ٢٧-٧-٢٠٢٠ عایشە تەها ک ناسریاگە وەناو ''داڵگ شەهیدان'' لە سلێمانی ماڵئاوایی دویایی کرد دویای زیانی وەگەرد بیماریەگە لە تەمەن ٩٤ ساڵان. لە ٢٣ کانون یەکەم ٢٠١٤ ، مەسعود بارزانی سەرکردەی کورد، ک ئەو مەوقە سەرۆک هەرێم بوی ناوی نا وە '' داڵگ شەهیدان''.