رۆبێرتۆ کارلۆس و باترێک کلویفیرت باس دڵخوەشییان وە خەڵک هەولێر کەن
شەفەق نیوز/ دوو هەسارە رۆبيرتو کارلۆس بەرازیلی، و باتریک کلویفیرت هۆڵەندی، ئمڕوو سێشەممە، باس دڵخوەشییان وە خەڵک هەولێر پایتەخت هەرێم کوردستان کردن.
کارلۆس لە کۆنگرەیگ رووژنامەوانی لە هەولێر وت: رەفتارەیل خەڵک هەولێر فرە دڵی گردیە، و خوەیان دووس وەرزشیین، و فرە خوەشهاڵم ک هامە ئیرا و نووڕمە کەلتوور و گەلەیل جیاوازیگ.
لەباوەت تۆپان لە دەوڵەتەیل ئاسیا، کارلۆس وت: تۆپان لە کشوەر ئاسیا هللە پیشکەفتن، و ئیسە ئاست تیم و بازیگەرەیلە لە جاران خاسترە، و من بڕوا دیرم ک یە خاستریش بوود ئەگەر گرنگی فرەتر وە گەنجیلە بیریەێد.
لەلای خوەییش، باتریک کلویفیرت وت: ئاسان نییە باس دەوڵەتیگ یا شۊنیگ بکەێ ک وەرجەوە نەیدەسەی، وەلێ بیگومان ئی وڵاتە رەنگینە، و لەوە گرنگتر خەڵکەگە گورجە و رەفتاری وەرد میوانەیلە خاسە.
سەردان کارلۆس و کلویفیرت لە چوارچیوەی بەشداریکردنیان لە بازی تۆپان تیەێد ک کۆمپانیای کۆڕەک لە یاریگای شەهید فڕانسوا حەریری لە هەولێر رێکی کردیە.
