دویای رویوەڕوبینەیلیگ.. پێشمەرگە شکست وە تەقەلای دزەی چەکدارەیلیگ لە سوریا وەرەو هەرێم تێەرن
شەفەق نیوز/ سەربەست لەزکین جینشین وەزارەت پێشمەرگە لە حکومەت هەرێم کوردستان، ئمڕوو چوارشەممە، راگەیان ک هێزەیل پێشمەرگە شکست وە پەلاماریگ هاوردن لەلایەن هێزەیلیگ سەروە پەکەکە لە سوریا هاتنە.
لەزکین لە کۆنگرەیگ رۆژنامەوانی ئاژانس شەفەق نیوز ئامادەی بوی وت: شەفەق ئمڕوو، کۆمەڵەیگ لە یەپەژە پەلامار خاڵیگ ئەرا هێزەیل پێشمەرگە لە ناوچەی سحێلا دان، و بویە رویوەڕوبین سەختیگ نزیکەی دوو سەعەت وەپی چگ، وتیش؛ پێشمەرگە توێنست شکست وە هێزە پەلاماردەرەگان بارێد ک خوازین دژە وەرەو خاک هەرێم بکەن.
وتیش؛ هەرچەن رویوەڕوبینەگە سەخت بوی بەڵکم هیچ زەخمداربوینیگ لە لایەن هێزەیل پێشمەرگە نەوی، و ئاماژە کرد ک هێزە پەلاماردەرەگان تەقەلای داگیرکردن خاڵیگ سەروە پێشمەرگە دان بەڵکم شکست هاوردن، و دووپاتکرد ک ماف پێشمەرگەس وەرگری لە خاک خوەی بکەێد.
لەزکین داوا لە هاوپەیمان ناودەوڵەتی کرد هەڵوێستیگ وەرانوەر ئی پەلامارەیلە بیاشتاد ک پەکەکە و باڵەکانی ئەنجامیان دەن، وتیش؛ ئەوەسا ئمڕوو خەوەردار هاوپەیمانەگە وە پەلامارەگە کەیمن.
لەزکین جەختکرد ک زانیمن ک مەزڵوم عەبدی سەرکردەی قەسەدە نێتوێنێد لە فەرمانەیل پەکەکە دەرچووک، و دووپاتکرد ک ئیمە نێخوازیمن بچیمنە ناو جەنگ هەرچن پەکەکە دەسی هاناو رووداوەیلیگ لە هەرێم.
و ئاماژە کرد ک ری نەیریەێد دووارەکردن پەلامارەیل یەپەژە لەبان هێزەیل پێشمەرگە، و وتیش؛ پەکەکە ریگری لە ئاوەدانکردنەوەی زیاتر لە ٥٠٠ ئاوای لە هەرێم کەێد، و ناوچەیلیگ پێشکەش کردە تورکیا.
دەربارەی رێککەفتن هەولێر و بەغداد لەبان قەزای شەنگال جینشین وەزارەت پێشمەرگە وت؛ هیمان پەکەکە شەنگال داگیر کردگە و رێککەفتنەگە نەکەفتگەسە ئاست جیوەجیکردن، و حەشد شەعبی لەولا پشتگیری پەکەکە کەێد.
