دویای رەسین وە بندروسی.. گەشەیگ لە بڕیار چووڵکردن خانەقین لە هیزەیل کورد

دویای رەسین وە بندروسی.. گەشەیگ لە بڕیار چووڵکردن خانەقین لە هیزەیل کورد
2022-10-10T13:04:20+00:00

شەفەق نیوز/ سەرچەوەیگ پایەبەرز لە ئاسایش خانەقین، ئمڕوو دووشەممە، ئاشکرای پادویاخستنیگ لە بڕیار چووڵکردن هیزەیل کورد، ک لەبنەمای زانیاریەیلیگ ئەمنی هەڵە باسی کریا.

سەرچەوەگە ئەرا ئاژانس شەفەق نیوز وت: بڕیار چووڵکردن یا کەمکردن هیزیەیل کورد لە خانەقین ک قسە و باس فرەیگ و ناڕەزایی سیاسی و جەماوەری لەشوینی بوی، چوودەو ئەرا زانیاریەیلیگ هەڵە و ناهویرد لە شمارەیل هیزیەیل کورد لەناو خانەقین.

دووپات کرد ک شاندیگ ئەمنی وە ئامێر سەربازی، لەی سێ رووژ گوزەشتە گەردینیگ گشتگیر ئەرا شوینەیل کەرتەیل کورد ئەنجام دا، ک بارەگای پیشمەرگە لەبان چەم ئەڵوەن، و بارەگای سریەی فریاکەفتن لە پۆلیس کوردستان وەرانوەر گەڕەک شەهیدەیل، وبەش پۆلیس خانەقین سەروە پۆلیس کوردستان، و هیزەیل پاسەوانی بەنداو ئەڵوەن، و خاڵەیلیگ هاوبەش ئەرا پۆلیس کوردستان لە کەلار، و بنکەی ئاسایش خانەقین گردەو.

سەرچەوەگە دیاری کرد ک دویای ئەو ئامارکردن هویردە، بڕیار چووڵکردن بارەگایل خریا دویا، تا ئەوەنە گردەوبوینیگ هاوبەش لە پارێزگای سلێمانی کریەێد، وە بەشداریکردن جیگر فەرماندەی ئۆپراسیۆنەیل هاوبەش فەریق روکن عەبدولئەمیر شمەری، و لایەنەیل ئەمنی لە پارێزگای سلێمانی لە بارەگایل فەرماندەیی، ئەرا رەسین وە رێککەفتن لەی باوەتە.

وەرجەیە، سەرچەوەیگ ئەمنی ئەرا ئاژانس شەفەق نیوز وت: فەرمانەیلیگ ئەمنی لەلاین دەسەڵاتەیل فیدراڵی وە چووڵکردن بارەگای سریەی فریاکەفتن، و هیزەیل پاسەوانی بەنداو ئەڵوەن، و بارەگای پیشمەرگە لەناو هوتێل گەشتیاری لەبان چەم ئەڵوەن لە خانەقین لە هیزەیل کورد هاتیە.

Shafaq Live
Shafaq Live