دویای 40 ساڵ جەنگ.. پەکەکە ئاگربەسی راگەینێد

شەفەق نیوز/ پارت کرێکاران کوردستانی، ئمڕوو شەممە، ئاگربەسی راگەیان، ئەوەیش لەبان سڵای ریبەری عەبدولڵا ئۆجەلان، دویای 40 ساڵ لە جەنگ وەرانوەر دەوڵەت تورکیا.

دەسەی جیوەجیکار پەکەکە لە بەیاننامەیگ رەسیە ئاژانس شەفەق نیوز وت: لەبان داوای ریبەر حزبەگە عەبدولڵا ئۆجەلان، لە ئمڕووەو ئاگربەسی راگەینیمن، و دووپات کرد کە وەدەسهاوردن کارەیلیگ جویر دانان چەک، تەنیا لەڕی سەرکردایەتی خود ریبەر ئاپو جیوەجی کریەێد.

دەسەی جیوەجیکار پەکەکە لەو بەیاننامە کە ئەرا (گەل نیشتمانپەروەرمان و رای گشتی) ناونیشان کریاوێد، وت: داوای ریبەر ئاپو لە 27 شوبات وە ناونیشان (داوای ئاشتی و کۆمەڵگەی دیموکرات) ریەگە لە وەردەم گشت هیزەیل ئازادی و دیموکراتی رووشن کەێد، و جویر مانفیستۆی سەردەم دریەێدە قەڵەم، و چوینکە ئی مانفیستۆ شایەت لەلای گەل ئیمە و لەلای مرۆایەتی بەرزەو بویە، ئیمە وە گشت رێزیگ سڵاو لە ریبەر ئاپو کەیمن.

بەیاننامەگە وتیش: ئی داوا لە کاریگ میژووی تیەێد کە لە کوردستان و خوەرهەڵات ناوڕاس دەسوەپی کرد، وتیش: ئی گامە کاریگەری گەورەیگ لەبان گەشەکردن سەرکردایەتی دیموکرات و ژیان ئازاد لە ئاست جیهان دیرێد.

 دووپاتیش کرد کە بڵاوکردن ئیجوبر داواکارییە وەیجویرە گامیگ فرە گرنگە، وەلێ جیوەجیکردنی وە سەرکەفتنی گرنگترە، دووپات کرد کە پەکەکە پابەندە وەی داوا وەشیوەیگ راستەخۆ، و ئەوەسا گامەیلیگ وەگورەی گرنگی و پەڵپەیلی جیوەجی کەێد.

بەیاننامەگە وتیش: قەوارەی سەرکردایەتی و ئەنجومەن مەرکەزی پەکەکە هیز رێکخستن خەبات دروس کەن، و دووپات کرد کە حزبەگە خەبات میژووی گەورەیگ لە سەدەی گوزەشتە لە کوردستان رانیە، و دەسکەفتەیل گەورە وە قوربانی ز پابەندی و وەرخودان وەدەس هاورد.

وتیش: ئیمە وە گشت رێزیگ یاد شەهیدەیل ری ئازادی کەیمن، و پەیمان خوەمان نووەو کەیمن وە وەردەوامی لە ریەگە وەخود مۆڕاڵ و رکداری.

پارت کرێکاران کوردستانی دووپات کرد کە چوودە ناو قۆناغ نوویگ لە خەبات، و سوود لە نووڕین ستراتیژی ریبەر ئاپو و ئەزموون میژووی حزبەگە گرێد، ئەرا وەدەسهاوردن ئامانجەیلی وە ریڕەوی سیاسی دیموکراسی.

ئاگربەسی و گرنگی پابەندبوین ئەو لایەنەیل ترەک 

بەیاننامەگە دیاری کرد کە لە جیوەجیکردن داوای ریبەر ئاپو، ئەرا ئاشتی و کۆمەڵگەی دیموکرات، لە ئمڕووەو ئاگربەسی راگەینیمن، هەرچەن هەر پەلاماریگ لەبانمانیش بوود، حزبەگە ئۆپراسیۆن سەربازی جیوەجی نیەکەێد.

وتیش: وەجیهاوردن کارەیلیگ جویر دانان چەک جیوەجی نیەکریەێد مەگەر لەڕی سەرکردایەتی ریبەر ئاپو.

بانان حزبەگە و هەڵوێستی لە کۆنگرەی هاتگ

حزبەگە هەمیش ئامادەیی خوەی ئەرا ئەنجامدان کۆنگرە وەگورەی داوای ریبەر ئاپو نشان دا، وەلێ وەجیهاوردنی پەیاکردن رەوشەیل گونجیاگ خوازێد.

دووپاتیش کرد کە ئەرا سەرکەفتن ئی کۆنگرە بایەسە خود ریبەر ئاپو رینمایی سەرەکیی بەێد. 

بەیاننامەگە وتیش: وەجیهاوردن داوای ئاشتی و کۆمەڵگەی دیموکرات وەشیوەیگ سەرکەفتی، و مسۆگەرکردن چگن وەرەو دیموکراتی لە تورکیا و خوەرهەڵات ناوڕاس وە چارەسەر دیموکراتی ئەرا پرس کورد، دابینکردن مەرجەیل خوازیاگ تواێد ئەرا مسۆگەرکردن ئازادی ریبەر ئاپو لە روی فیزیکی و هویر و سیاسی خوازێد.

وتیش: گرنگە گشت ریگریەیل لەڕوی هەڤاڵان ریبەر ئاپو لاوریەن، تا بتوەننن وەبی پاوەنکردن وڵمەیزی پەیوەندی بکەن.

 دووپات کرد داوای ریبەر ئاپو کۆتایی نییە، بەڵکم سەرتای نووە، وتیش: کارەیل فرەیگ عەس بایەس بوی لە 35 ساڵ گوزەشتە، وەتایبەت لەی بیس دویاییە جیوەجی بکریەن، وەلێ لەبان ئەو داواکارییەیل وەردەوامە جیوەجی نەکریان.

وتیش: ئیرنگە دی جیوەجیکردنیان وەبی دیرکەفتن گرنگە.

دووپاتکردن لەبان رۆڵ ژن و گەنج لەی قۆناغە

بەیاننامەگە داوا لە ژن و گەنجەیل وەشیوەیگ تایبەت کرد رۆڵ خوەیان لە قۆناغ میژوویە بڕانن، و دیاری کرد کە گرنگی ئی داوا زیایەو بوود وەگەرد نزیکەوبوین رووژ ژن لە 8 ئادار و جەژن نورووز.

 لە کۆتاییی بەیاننامەگە سڵاو رێز ئەرا ریبەر عەبدولڵا ئۆجەلان پیشکەش کرد، و دووپات کرد لە پابەندیی وە وەردەوامی خەبات تا وەدەهاوردن ئازادی و ئاشتی.

لە  شوبات 2025، عەبدولڵا ئۆجەلان ریبەر پەکەکە کە لە تورکیا زیندانە، داواییگ میژووی لە زیندانەگەیەو لە دوورگەی ئیمرالی کلکرد، لەناوی ده ازا لە حزبەگەی کرد واز لە چەک بارن و خوەیان هەڵوەشننەو. 

 ئی پەیامە لە ئیستەنبوڵ ولایەن شاند حزب یەکسانی و دیموکراتی ئەرا گەلەیل خوەنریاوە کە لایەنگر کوردە، کە وەرجەیە لە خود رووژەگە ئەو شاندە سەردان ئۆجەلان کرد.