ده‌يان خانمه هونه‌رمه‌ند و ره‌ساننكار داواى يه‌كسانى له سه‌رۆك هه‌رێم و حكومه‌ت ئه‌كه‌ن
شه‌فه‌ق نيوز/ له نامه‌يگ واز ك له‌لايه‌ن 62 خانمه ره‌ساننكار و گورانيچڕ و چالاكوان و هونه‌رمه‌نده‌و ئاراسته كريا، له‌تى داوا له هه‌ريه‌ك له نێچيروان بارزانى سه‌رۆك هه‌رێم كوردستان و مه‌سرور بارزانى سه‌رۆك راسپارياگ ئه‌را دامه‌زرانن حكومه‌ت كرد هه‌وڵه‌يليان زياتره‌و بكه‌ن ئه‌را جوه‌يجيكردن يه‌كسانى ره‌گه‌زى له هه‌رێم كوردستان.
ئه‌و خانمه‌يله له‌و نامه داوا كردنه هه‌وڵ بدريه‌ێد ئه‌را مقه‌يه‌تيكردن له‌و ژنه‌يله ك له بوار ره‌سانن و هونه‌ر كار ئه‌كه‌ن و داوايش له حكومه‌ت هه‌رێم كردنه په‌يجورى له مه‌سه‌له‌يليگ بكا ك ئه‌ياده تويش ره‌ساننكاره‌يل ژن جوور په‌لامار و تون وتيژى و ياساى تايبه‌ت له‌ى باوه‌ته‌و دابنريه‌ێد.
له‌و نامه ك له‌لايه‌ن هه‌ريه‌ك له ده‌شنێ موراد و په‌رى خان نويسرياگه، له‌رێ داناين هاشتاك TimesUp# له‌ناو ماڵپه‌ڕ په‌يوه‌ندى كۆمه‌ڵايه‌تى، هاتگه: ئيمه له‌ئيسه‌و دويا بيدنگ نادوێم له‌بان ئه‌و ديارده‌يله‌و ئه‌خوازيم وه‌يه‌كه‌و كار بكه‌يم ئه‌را روێ وه‌ڕوێ بوينه‌وه‌ى ئى مه‌سه‌له‌يله.
جى باسه، له نامه‌گه داوايش له ريكخرياگ ناوده‌وڵه‌تى كرياگه هاوكارييان وه‌ل حكومه‌ت هه‌رێم كوردستان زياتره‌و بكه‌ن له‌وه‌رخاتر له‌ناوبردن تون وتيژى دژ ژنه‌يل له هه‌رێم كوردستان يا داناين مه‌رزيگ ئه‌را ئه‌و ديارده‌يله.
