دهۆک ئامادەکاری ئەرا لافاوەیل زمسان کەێد
شەفەق نیوز/ فەرمانگەیل خزمەتگوزاری لە دهۆک، ئمڕوو دووشەممە، دووپات کرۆم کە ریکارەیلیگ مقیەتیکردن جیوەجی کەن ئەرا ئەگەر هەر لافاویگ لە ئەنجام وارانەیل وەرز زمسان، دیاری کرد کە پارێزگاگە ئەرا چوار پارچە بەشەو کریا ئەرا بەشەوکردن تەقەلایل و کۆنترۆلکردن.
یونس جانۆ وەڕیەوبەر فەرمانگەی ریڕەوی دهۆک ئەرا ئاژانس شەفەق نیوز وت: فەرمانگەگەی وە هەماهەنگی وەرد ئەو فەرمانگەیل پەیوەندیدار ریکارەیلیگ ئەرا نواگردن هەر لافاویگ لە وەرز زمسان جیوەجی کرد.
وتیش: چەن گردەوبوینیگ هەماهەنگی وەرد لایەنەیل پەیوەندیدار ئەنجام دایمن، ئەرا دویرکەفتن لە رخداری لافاوەیل و گشت ریکارەیل خوازیاگ ئەرا نواگیریکردن هەر ئەگەریگ لەی ساڵە وەجی هاوردیمن.
جانۆ وتیش: دهۆک ئەرا شەش ناوچەی ئیداری بەشەو کریا ئەرا رەفتارکردن وەرد فریاکەفتن، کە فەرمانگەی ریڕەوی دوو ناوچە وەڕیەو بەێد، و سێ ناوچە کەفنە لای سەرۆکایەتی شارەوانی، و ناوچەیگیش ئەرا وەڕیەوبەرایەتی وەرگری شارستانی.
دووپات کرد کە پەیوەندی وەردەوامیگ ناوەین گشت وەڕیەوبەرایەتیەیل پەیوەندیدار هەس ئەرا مسۆگەرکردن جیوەجیکردن ریکارەیل و وەڵامدان زویوەزوی ئەرا پاڵپشتیکردن هاوڵاتیەیل ئەگەر هەر لافاویگ باێد.
جانۆ باش ئەو تەقەلایلە کرد ئەرا خاسەوکردن ژیرخانی ریڕەوی تەندروسی لە شارەگە کە زیاتر لە ٢٣٢ ریڕەوی لەو ناوچەیلە پاکەو کریا کە لە ئادار گوزەشتە لافاو وەخوەیان دین، وەگەرد وەردەوامی تیمەیل ئەرا چارەکردن کێشەیل ریڕەوی لەو ناوچەیل.
وتیش: رخداری لافاو لە چەم "هشكه رو" لە دهۆک کە بویە هوکار خنکیان چوار کەس لە لافاوەیل ئادار گوزەشتە، وەشیوەی وەرچەویگ داوەزیا، لە ئەنجام تەقەلایل پاکەوکردن، وتیش: ئەو ماڵەیلە لە نزیک چەمەگە قەرەبوو کریەن دویای چووڵکردنیان وەلایەن حکومەت هەرێم کوردستان.
لەباوەت ئەو شوینەیلە کە کەفنە رخداری لافاوەیل، جانۆ دیاری کرد کە چوار تا پەنج شوین لە دهۆک هەس ئەگەر رخداری لە لافاوەیل دیرن، وەلێ تیمەیل مەیدانی لەی شوینەیلە جیگیر بوین، تا ئامادە بوون ئەرا دەسمیەتیدان هاوڵاتیەیل و هاوکاریکردن وەگەرد هەر گیچەڵیگ.
