دهۆک ئامادەکاری ئەرا ساڵیاد ئەو رووژە کەێد ک بویەسە پارێزگا.. وینە
حەسەن فەتاح قسەکەر فەرمانگەی روشنهویری دهۆک ئەرا ئاژانس شەفەق نیوز وت: فەرمانگەگەی وە هاوکاری بڕیگ لە فەرمانگەیل پەیوەندیدار ئامادەکاری ئەرا کەرنەڤاڵیگ جەماوەری وە ٥٤مین ساڵیاد پارێزگابوین دهۆک تەواو بوی، ک لەژیر دروشم "ژینگە ماڵمانە" لە ساعەت هەفت ئیوارەی سوو شەممە لە پارک نەورووز دەسوەپی کەێد.
وتیش؛ لەناو ئاهەنگەگە ریزگردن لە شمارەیگ کەسایەتی کریەێد ک خزمەت پارێزگاگە کردنە، و ئاهەنگ گورانی وە بەشداریکردن شمارەی گەورەیگ لە گورانیچڕەیل، وەگەرد هەڵپەڕکە.
جی باسە ک لە ٢٧ ئایار ١٩٦٩ دهۆک بویە پارێزگا، و ناوەندەگەی شار دهۆک، و ٧ قەزا و ٢٩ ناحیەی دیرێد، و لە سێ لاوە کویە ها دەوری، ک دیمەن رەنگینیگ دەێدە شارەگە، و چەمیگ بویچگ وەناویا رەد بوود، ک لە بەنداو گەورەی دهۆک تیەێد، و یەکیگە لە رەنگیترین شوینەیل گەشتیاری لە شارەگە.
پارێزگای دهۆک وە گەشتوگوزاری ناودیارە، وەگەرد جیوازیەیلیگتر، و هەمیش خاوەن گرنگی میژووی و جوگرافیە، چوینکە ئاسەواری کوینەی فرەیگ هاناوی، ک لە تەپە و ئەشکەفتەیل جیماگەیل شارستانیەیلیگ جیاجیا پەیا کریا، بیجگە شوین ستراتیژیی لەبان سنوور دوو دەوڵەت، و رەدبوین کڕ هامشوو ناودەوڵەتی ناوبەین عراق و تورکیا لەلاییگ، و لەئەو لاگە ناوبەین جەهانی دەیشت، و لویلەی نەفت لە کەرکوک وەرەو تورکیا وەناوی رەد بوود.
