داواکردن لە پەرلەمان کوردستان وە پابەندکردن کۆمپانیایلیگ کیمیایی دانەسە سەدام وە قەرەبووکردن دارایی
شەفەق نیوز/ تیم وەرگری لە قوربانیەیل هەڵەبجە، ئمڕوو شەممە، داوا لە پەرلەمان کوردستان کرد، بڕیاریگ دەرکەێد وە پابەندکردن کۆمپانیایلیگ بیگانە وە قەرەبووکردن دارایی ئەرا قوربانییەیل بمبارانکردن وە چەک کیمیایی، لەوەر ئەوە چشتەیلیگ چنە ناو دروسکردن ئەو چەکەیلە دانەسە رژێم وەرین.
پارێزەر ئەیاد کاکەیی وەرپرس تیمەگە لە کۆنگرەیگ رۆژنامەوانی هاوبەش وەگەرد تیمەیل وەرگریەگە وت: وەداخەو ک پەرلەمان کوردستان نە لە دەورەی ئیسەی ونەیش لە دەورە وەرینەگان باس لە قەرەبووکردن خاوەن قوربانیەگانیان بمبارانە کیمیاییەگە لەبان هەڵەبجە کردن، وتیش؛ دەوڵەت عراق ئامادەی قەرەبووکردنیان نییە.
وتیش؛ پەرلەمان کوردستان توێنێد لەڕی پڕۆژەی یاسایگ یا بڕیاریگ پابەند ئەو کۆمپانیایلە بکەێد ک هاوکار بوینە لە داین مادە کیمیاییەگان ئەرا رژیم وەرین وە قەرەبووکردن خاوەن قوربانیەگانیان، بەڵکم وەداخەو ک پەرلەمان تەقەلای کارکردن وەشیوەیگ راسی لەی باوەتە نیەێد.
