دامەزراو خەیرخوازی بارزانی کەفێدە پلەی یەکەم لە جهان
شەفەق نیوز/ دامەزراو خەیرخوازی بارزانی، ئمڕوو چوارشەممە، راگەیان ک خوەی کەفتە نوای لە لیست رێکخراوە خەیرخوازە نا حکومەتیەگان لە ئاست جهان لە ئەنجامدان پڕۆژەو چالاکیەیلیگ رەسیە دەسمیەتکردن ئاوارە و هەژارەگان.
موسا ئەحمەد وەرپرس دامەزراوەگە لە کۆنگرەیگ رۆژنامەوانی ئمڕوو و ئاژانس شەفەق نیوز ئامادەی بوی وت: ٢٠٢٠ ساڵ سەختیگ بوی، بەڵکم هەمیش ساڵیگ پشتگیریکردن بوی لەلایەن دامەزراو بارزانی ئەرا هەژارەگان وکەمدەسەگان.
وتیش؛ ئمساڵ داوای پشتگیری لە دامەزراوە خەیرخوازە ناوخۆیی و ناودەوڵەتیەگان نەکردیمن، بەڵکم لەلیمان خوازین چوێن هاوکاریەگان بڕەسیمنە هەژارەگان.
ئەحمەد وتیش؛ دامەزراو خەیرخوازی بارزانی توێنست دەسکەفتەیلیگ لە ئاست گشت جهان وەدەس بارێد لەو چالاکیەیلە ک لە وڵاتەگان ولەناو هەرێم کوردستان وعراق ئەنجامیان دار و توێنستیمن ٩ مەلیۆن و ٩٠٠ هەزار بەش خواردەمەنی وە ٤٥ رووژ دابەش بکەیمن، و ئەیە ژمارەیگ پەیمانەیی جهانیە.
و ئاماژە کرد ک دامەزراو خەیرخوازی بارزانی هالە پلەی یەکەم نەگ لە ئاست هەرێم کوردستان وعراق وناوچەگە بەڵکم لەبان گشت جهان.
لەلای خوەییش رۆندی خان وەڕێۆبەر دامەزراوەگە لە کۆنگرەگە وت: ئەمساڵ ٩ ملیار دینار رەسیە سەندوق دامەزراوەگە وەگەرد ٤٧ ملیار دینار هاوکاری و چشتەیلیگ دابەشیان کریا بان هەژارەگان، وەهمیش ١٥ ملیار لەلایەن خەیرخوازەگان لە هەرێم کوردستان، و ٧ مەلیۆن لەلایەن رێکخراوەیلیگ ناودەوڵەتی و ناوخۆیی، و ٣٤ ملیار لەکاریگ هاوبەش لەناوبەین دامەزراو خەیرخوازی بارزانی و رێکخراوە ناودەوڵەتیەگان.
هەمیش ئاماژە کرد ک دامەزراوەگە ٣٠ کامپ لە پارێگاگان هەرێم کوردستان وەڕیەو بەێد.
