دەسکردن وە چاپ ٢٤ لە فیستیڤاڵ گەلاوێژ
شەفەق نیوز/ لە ژیر دروشم «لاوردن دەمپیچەیل» چاپ بیس و چوارەم لە فیستیڤاڵ «گەلاوێژ» لە شار سلێمانی، لە هوتێل «رامادا» وە چەودیری مەڵا بەختیار سەرپەرشتیار گشتی لەبان فیستیڤاڵەگە دەس وەپیکرد.
ئیبتسام ئیسماعیل خانمە وەرپرس ناوەند فیستیڤاڵ رووشنهویری ئەرا ئاژانس شەفەق نیوز وت: ئمڕوو وە ئامادەبوین بڕیگ لە نەختەیل سیاسی و رووشنهویرەیل لە شار سلێمانی واز کریا.
چاپ ٢٤ لە فیستیڤاڵەگە باس کەلتوور ئیرانی و شوینەیلی لە ناوچەگە کەێد، وە هاتن بڕیگ لە نووسەر و شاعرەیل ئیرانی، و تا سێ رووژ وەردەوام بوود.
مەڵا بەختیار فیستڤاڵەگە وە وتاریگ واز کرد، لەناوی دووپات کرد لەبان گرنگی چگن وەرەو نووسین دەستور هەرێم کوردستان، و هەڵبژاردن وەرجەوەخت لە عراق.
لەناو وتارەگەی وت: لەوەر گەندەڵی دیموکراتی لە وڵاتەگە نەما، وئەگەر هەڵبژاردن ئەنجام دریا ئەوەسا کەفیمنە نوای گرفتەیلیگ گەوراتر، لەوەر تەقەلایل لایەن و حزبەیل ئەرا دابینکردن بەرژەوەنەیلیان.
دەستور هەرێم کوردستان
مەڵا بەختیار وتیش: وەرپرسەیل لە هەرێم کوردستان توومەتبار یەکتر کەن وە نەنووسین دەستور، وتیش؛ ئەگەر نووسیایش گرفتەیلیگ لە نوامان مینن، چوینکە نووسینەگەی ئەوە نییە ک کۆتایی وە ناکۆکیەیل باێد، و نموونەیلیگ هەس جوور ئەمریکا لە دەوڵەتە گەپەەیلە و هەرچەن لە چەن ساڵیگ دەستور نووسانە هیمان گرفتەیلیگ دیرن.
وتیش: من بیئومیدی نێخەمە دڵدان، بەڵی نووسین دەستور ئەرا هەرێم کوردستان گرنگە، و داوا لە حزبە سەرکیەیلە لە هەرێم کوردستان کرد لەبان یەک مێز دانیشن تا ریگرەیل نوای دەستورەگە لابیەن.
مەڵا بەختیار وتیش؛ دویای گونجانن بڕیگ لە وڵاتە عەرەوەیل وەگەرد ئیسرائیل، ئەوەسا ئیران بوودە میرگ ئاشتەوبوین لە ناوچەگە، ک وەو جوورەگ وەرجەیە وتم: لە عەرەویل عەرەوتر نەوون لە باوەت فەلەستین.
