دەسگیرکردن پەنج کەس وە توومەت ساختەکاری و بازرگانی وە چەک

وەڕیاوبەرایەتیەگە لە بەیاننامەیگ راگەیان، مەفرەزەیگ لە نویسینەگەی تاوانەیل کوردسات ، خوەرهەڵات و نەهیشتن تاوان ساختەکاری، دویای ئەوەگ هێزەیل پۆلیس زانیاری لەبان شمارەیگ توومەتبار جەمکردن، لە شیوەی باند پاسپۆرت و پێناس و چەن بەڵگەیگتر ساختە کەن هەمیش بازرگانی وە چەک کەن، لە دویای وەرگردن بڕیار دادوەر لە چالاکیەیل هاوبەش توەنست هەر پەنج توومەتبارەگە لە وەخت دروسکردن بەڵگەنامەی ساختە و مامەڵەی سەنین و فرووشتن چەک دەسگیرکریان. 

لەوەخت دەسگیرکردنیان دەسنریا وەبان چەکیگ لە جویر دەوانچە و چەن بەڵگەنامایگ ک توومەتبارەیل ساختەی کردبوین.

وە بڕیار دادوەر وەپای مادەی ٢٨٩- ٢٩٨ لەیاسای سزادان گیریانە و لێکۆڵینەوە وەگەردیان وەردەوامە.