دەسکریا وە قۆناغ یەکەم سەرژماری دانیشتگەیل لە هەولێر

شەفەق نیوز/ بەش ئامار لە هەولێر، ئمڕوو شەممە، دەسکردن وە قۆناغ یەکەم پرۆسەی سەرژماری دانیشتگەیل لە گشت عێراق ڕاگەیان، باس لە هویرد کاریگەرییەیل پڕۆسەگە لە هەولێر کرد.

 وەڕێوەبەر ئامار دلزار حەمە ساڵح لە کۆنگرەیگ رووژنامەوانی کە پەیامنێر ئاژانس شەفەق نیوز ئامادەی بوی، وت: ئی قۆناغە تا نۆزدەی ئی مانگە وەردەوام بوود و قۆناغ دویەمیش لە ٢٠ تا ٢٢ مانگ وەڕیەو چوود، لە وەختیگ قۆناغ سێیەم تا گشت تەواوبوین مانگ کیشێد.

 ساڵح ئاشکرا کرد کە نزیکەی 10 هەزار فەرمانبەر بەشداری لە سەرژماریەگە کەن لە گشت عراق، و ژماردەرەیل لە هەولێر لە 15 قەزا و 46 ناحیە کار کەن، کە 150 ئاوای و زیاتر لە 537 گەڕەک هاناوی.

 وتیش: قۆناغ دویەم سەرژمارییەگە توومارکردن دویایین ئامارەیل شمارەی دانیشتگەیل عراق لەخوەی گرێد، و قۆناغ سێیەم تایبەت وە  پیشکەشکردن وەڵامەیلە وە فۆرمیگ لە ٧٦ پرسیار.

 ساڵح دووپات کرد کە سەرژماری گامیگ گرنگە ئەرا نووەوکردن داتای دانیشتگەیل، کە بەشدارە لە پاڵپشتیکردن پرۆسەیل پلاندانان و پەرەپیدان.

 حکومەت هەرێم کوردستان پشوو فەرمی تا ماوەی نۆ رووژ دادە گشت فەرمانبەرەیل مەدەنی و سەربازی و خوەنەواری لە گشت ئاستەیل خوەنستن لە سنوور ناوچەیل مادەی 140، وە ئامانج بەشداریکردن لە سەرژماری گشتی دانیشتگەیل کە بڕیارە لەی هەفتە وەڕیەو بچوود.