دۊای مردن ژنەگەی.. کازم ساهر ئەرا سپاسکردن سەردان سلێمانی کەێد
شەفەق نیوز/ هەڤاڵ ئەبوبەکر پارێزگار سلێمانی، ئمڕوو شەممە، هۊردەکارەیل نوویگ لەباوەت مردن ژن هونەرمەن عراقی کازم ساهر، لە شار سلێمانی لە هەرێم کوردستان ئاشکرا کرد.
ئەبوبەکر ئەرا ئاژانس شەفەق نیوز وت: ژنەگەی کازم ساهر، لەناو یەکیگ لە خەسەخانەیل پارێزگاگە مرد، دۊای خەفتنی لە رووژەیل گوزەشتە لەناوی، ئەوەیش لەوەر بیماریی.
وتیش: رسوومەیل نمازخوەنین خانمەگە، لە مزگەفت (ئەحمەد حاجی عەلی) وە ئامادەبۊن یەکیگ لە کوڕەیلی و کەسوکارەیلی خوەنیا، و وەگورەی تەمەی خوەی لە سلێمانی نریا خاک.
ئەبوبەکر وتیش: هونەرمەن کازم ساهر ئەوەسا لە هەفتەی ئایندە سەردان سلێمانی کەێد، تا سپاس لە خەڵک پارێزگاگە بکەێد.
دۊەکە جمعە، هونەرمەن عراقی کازم ساهر، مردن ژن وەرینی (عروبە ساهر) راگەیان.
پەیامنێر ئاژانس شەفەق نيوز وت: تەرم ژنەگەی کازم ساهر لە خەسەخانەی فاروق دەرکریا، و وەرەو دۊاماوای خوەی لە قەورسان "بەکرەجۆ" لە سلێمانی بریا.
