خواردن وەتام ماڵی.. چێشتخانەیگ لە سلێمانی ژن وەڕییەو بەێد
شەفەق نیوز/ چێشتخانە وازکردن پڕۆژەی نوویگ و سەرنجڕاکێشیگ نییە، وەلی هەنای ژن ئاشەگەی بکەێد و وەڕییەو بوەێد، لەیرا چشتەگە جیوازەو بوود، ک ئەو خواردنەگ دەسەیل ژنە زرنگەگان کەێدەي، و ئەزموون خوەراک ماڵی ئەرا چێشتخانەگان تیەرێد، ئەوە بوودە نیشانەی جیوازیگ.
ژن کوردستانی، وەو شیوە ک هووکارەمان کرد ک خوەی هالە وەردەم لە نواگردن سەختیەگان، و قەیرانەگان کەێده رییگ ئەرا دروسکردن خوەی و پشت بەسانن وەخوەی.
هەوار شەوکەت وەرپرس پڕۆژەگە ئەرا ئاژانس شەفەق نیوز ئووشێد: لە زویەو هویر ئی پڕۆژە لەناو سەرم بوی، و دویای قەیرانە داراییەگە و کەم کاریەگە، وەرجە دوو هەفتەی گوزەیشتە، هویرەو وەگەرد هەیشت ژن کردم پویلیگ ئەرا وازکردن ئی چێشتخانە گردەو بکەم، تا ئەرامان بوودە سەرچەوی داهاتیگ.
شەوکەت دیاری کرد ک پڕۆژەگەمان بوودە دوو بەش، یەکەمەگە هالە چێستخانەگە، و دوویەمەگە هالە ئامادەکردن و ئاشکردن ئەرا خاوەن بۆن و پرسەگان و ئەرا هۆڵەگان.
و ئایا ئەگەر خوەی و هاوڕییەگانی کەفتنەسە وەر سەختیەیلیگ لە پڕۆژەگە، شەوکەت دیاری کرد ک: ژن لە سلێمانی وە هێزداریی ناسرياگه، وهیچ سەختییگ لەبانمان نییە، هەرچەن چێشتخانەگەمان کەفتیەسە گەڕەکیگ جەماوەری لە بازاڕەیل شارەگە وفرەی کڕیارەیلمان پیاون، و چێشتخانەیل فەریگ هاناوی و رکابەریەگە فرەس ئەرا ئەوە ک کڕیارەیلیگ زیاتر وەدەس بارێ، و وەختیگ خوازێد تا بنووڕیمنە ئەنجامەگان، لەلاییگ تر هاندانیگ لەلایەن کڕیارەیلمان ئەرا کارکردنمان جوور ژنەیلیگ هەس، ک خوەی مایەی پاڵپشتی و رکە تا وە خواردنە خاسەگە وەگورەی رکابەریەگە بویمن.
شەوکەت تەمەی ژنەگان کەێد ک پشت وەخوەیان بووەسن، و چەوڕی کەسیگ تر نەکەن، ک ژیان یەک ژیانە و دەرفەتەگە تەنیا یەک جار تیەێد، بوونە ئەو شیوەگ خوەدان خوازینەی، هەنای ئیوە وەگەرد یەک بوین وەهێزین، و ئاماژە کرد ک ئومید و سەبر و تەما دەر سەرکەفتننه.
جی باسە ک ژنەگان لە هەرێم کوردستان لە ئاست عراق خاوەن دەور خاسیگ بوین، وە پێشکەشکردن ئەوەگ ئەرا ژیانیان خاسە و پشبەسانن وەخوەیان و هاوماڵیکردن وەگەرد پیاو لە گشت چینەگان.
