خانمە وەرزشوانیگ کورد پلەی دویەم تیەرێد لە پاڵەوانیەتیگ ناودەوڵەتی

شەفەق نیوز/ خانمە وەرزشوان کورد، دڵکوش عەبدولڵا، دویەت شار رانیە لە هەرێم کوردستان، لە تەمەن 33 ساڵان، توەنست پلەی دویەم لە پاڵەوانیەتیگ ناودەوڵەتی دووسیانە ئەرا لەشجوانی وەدەس بارێد.

سەرچەوەیگ وەرپرس لە یەکێتی لەشجوانی عراق، ئەرا ئاژانس شەفەق نیوز وت: ئەو پاڵەوانیەتیە لە ماوەیلیگ جیاجیا ئەرا خانم و پیاوە وەرزشوانەیل رێکخریەێد، و هندستان میوانداری ئی چاپە کرد، و دڵکوش لەناو بەشداربویەیل ئی پاڵەوانیەتی ناودەوڵەتیە کە تا چەن رووژیگ وەردەوام بوی، پلەی دویەم وەدەس هاورد.

سەرچەوەگە دیاری کرد کە ئەو پاڵەوانیەتیە نافەرمییە، و نیەچوودە ناو سیستم یەکێتی لەشجوانی ناودەوڵەتی، لەبان یەیش، دەسکەفت دڵکوش وە گامیگ گرنگ دریەێدە قەڵەم، وەگەرد ئومید ئەوە کە بوودە شمارەیگ گرنگ لە نوینەرایەتیکردن عراق لە پاڵەوانیەتیەیل ناودەوڵەتی فەرمی لە بانان.