خانەقين.. وسیانیگ ناڕەزایی ئەرا پشتگیریکردن لە کورد سوریا (وینە)
شەفەق نيوز- خانەقین
دەیان کەس خەڵک قەزای خانەقین، ئیوارەی ئمڕوو سێشەممە، وسیان ناڕەزایی و هاوخەمی ئەرا کورد سوریا رێکخستن، و لەبان ئەو پەلامارەیلە کە وەلایەن باڵەیل چەکدار سەروە حکومەت سوریا وەسەریان تیەێد.
پەیامنێر ئاژانس شەفەق نیوز وت: وسیانەگە لە ناوڕاس ساڵ خانەقین لە فیلکەی کرندی وەڕیەو چگ، کە ئاڵای کوردستان بەرزەو کردن و سروود نیشتمانی کورد وتن، و داوای یەکڕزی کورد کردن ئەرا نواگیریکردن هەر پەلاماریگ وەبان چوار پارچەی کوردستان.
ناڕەزایەیل دووپات کردن کە وەسەرهاتەیل گەل کورد لە سوریا شکانن زاقە ئەرا مافەیل مرۆڤ، و بنەمایەیل مەردم و پەیماننامەیل ئاینی و رەوشتی و مرۆیی.
بەشداربویەیل داوا لە نەتەو یەکگرتگەیل و ئەمریکا کردن دەسوەردان کوتوپڕ بکەن ئەرا وسانن خوینڕشانن گەل کوردستان لەو ناوچەیلە، دووپاتیش کردن لە وەردەوامییان لە جویلەکردن و داوایەیل ئاشتەوایی لە خانەقین و گشت ناوچەیل کوردستانی ئەرا پشتگیریکردن برایەیلیان لە سوریا.
ناڕەزایەیل هەمیش ئامادەیی خوەیان نشان دان ئەرا وەرگریکردن لە خاک و خەڵک کورد لە سوریا ئەگەر دوژمنایەتی وەردەوام بوی.
