خەسەخانەی ناناکالی لە هەولێر: ساڵانە نزیکەی ١٨٠٠ تویشهاتن وە شێرپەنجە توومار کەێد

شفق نیوز ـ هەولێر

وەڕێوەبەری خەسەخانەی "ناناکالی" ئەرا شێرپەنجە و بیماریەیل خوین  لە هەولێر، هەردی جواد سابیر، ئمڕوو دووشەممە، راگەیان ساڵانە لە ناوەین 1500 تا 1800 تویشهاتن نوو وە  شێرپەنجە توومار کریەن، دیاریکرد خەسەخانەگە رووژانە لە ناوەین   350 تا 400 بیمار وەرگرێد.

 لە کۆنفرانسیگ رووژنامەوانی کە ئاژانس شەفەق نیوز ئامادەیبوی وە بوونەی رەسین 800 دەرمان دەگمەن ئەرا چارەسەر شێرپەنجە وەڕیوەچگ، ئێ دەرمانەیلە وە  هاوکاری دامەزراوەی خێرخوازی بارزانی و رێکخریاگ "ماین"ی نەرویجی دابین کریانە.

سابیر ئاشکرایکرد،  خەسەخانەی ناناکالی سێ مژارە سەرەکییەیل چارەسەرکردن گرێدە خوەی، کە بریتین لە گرێ رەقەگان، بیماریەیل خوین و شێرپەنجەی مناڵان، وتیش؛ خەسەخانەگە تەنیا خزمەت دانشتگەیل هەرێم کودستان نیەکەێد بەڵکم پیشوازی گەپیگ بیمارەیل کەێد لە پارێزگایەیل ناوڕاس و باشوور هاتنە.

لە باوەت رێژەی تویشهاتن، دووپاتکرد کە "شوین نیگەرانی نییە وە بەراورد وەگەرد فرەیگ لە وڵاتەیل جیهان  لە ئاستیگ نزمە".

دیاریکرد شمارەی  سەردانکەرەیل رووژانە رەسێدە 400 بیمار وە مانای توومارکردن 400 تویشهاتن نوو، بەڵکم ئەو بیمارەیلە لە گوزەشتە توومارکریانە وەپای پرۆتۆکۆل چارەسەرکردن هەوەجەکەێد سەردان خەسەخانەگە بکەێد وەشیوەی هەفتانە یا مانگانە".

لەباوەت رێژەی چارەسەربوین ئاشکرایکرد، هەڵسەنگاندن زانستی ناودەوڵەتیەیل ‌رێژەی خاسەوبوین لە شێرپەنجە ئەرا سێ ئاست بەشەوبوود ؛ لە وڵاتەیل گەشەکردگ بڕەگەی 30٪ ـە، لە وڵاتەیل وەنواچگ جویر ئەوروپا و ئەمریکا رەسێدە 90٪، لە وەختیگ هەرێمی کوردستان و خەسەخانەی ناناکالی رێژەی خاسەوبوین   وە 75٪ توومارکردیە.