حکومەت هەرێم کوردستان فەرمانگەی پاسپۆرت نوویگ کەێدەو

شەفەق نیوز/ رێبەر ئەحمەد وەزیر ناوخۆی هەرێم کوردستان، ئمڕوو پەنجشەممە، نووسینگەی دابەشکردن پاسپۆرت لە قەزای چەمچەماڵ سەروە پارێزگای سلێمانی کردەو.

ئەحمەد لە کۆنگرەیگ رۆژنامەوانی ئمڕوو وت: چەمچەماڵ قەزای گرنگیگە و ٣٠٠ هەزار کەس لەناوی نیشتەجیین و ٩ ناحیە هاناوی و ٤٠٠ ئاوای، وهەمیش سەدان لە خیزانەیل وکەسوکارەیل شەهیدەیل هانە ناوی.

و ئاماژە کرد ک یەکەم پاسپۆرت چاپ کریا ودریا کەسیگ لە کەسوکارەیل شەهیدەگان ئەنفال بەد ناو.

وەزیرەگە وتیش: ئیمە شانازی کەیمن وە هەر خزمەتیگ ئەرا دانیشتوەگان پێشکەش بکەیمن هەرچەن بویچگیش بوود، وحکومەت وەردەوامە لە خزمەت هاووڵاتییەل و لە ئمڕووەو دانیشتوەیل چەمچەماڵ زیان چگن وەرەو ناوەند پارێزگای سلێمانی ئەرا دەرکردن پاسپۆرت وەخوەیان نێەدوینن.