حکومەت هەرێم کوردستان دوو کار گرنگ لە دانوسەنین وەرد حکومەت سودانی دیاری کرێد
شەفەق نیوز/ جوتيار عادل قسەکەر حکومەت هەرێم کوردستان، ئمڕوو پەنجشەممە، دووپات لەبان ئەوە کرد ک لایەنەیل سیاسی کوردستانی کار ئەرا چارەکردن ناکۆکیەیل و باوەتەیل گیرهاتگ ناوبەین هەولێر و بەغدا لەڕی گفتوگۆ وەرد حکومەت فیدراڵی نوو، و زوور لەبان جیوەجیکردن مادەی ١٤٠ لە دەستوور کرد و داناین یاسای نەفت و گاز وەشیوەی هەماهەنگی.
عادل لە کۆنگرەیگ رووژنامەوانی وت: پلان حکومەت هەرێم کوردستان ئەوەسە ک ئەو باوەتەیلە ک ئەرا چەن ساڵیگ چارە نەکریانە بوونە ناووک گفتوگۆ، وتیش: هەمیشە دەسمان ئەرا گفتوگۆ و دانوسەنین وەرد حکومەت فیدراڵی درویژ کردیمنە.
دووپات کرد ک لەو باوەتەیلە ک ئەرا ئیمە گرنگە خاک هەرێم کوردستان و مادەی ١٤٠ لە دەستوور عراقە، وتیش: بایەتە ئی مادە جیوەجی بکریەێد، وبایەتە دوو دەسەی حکومەتی و پەرلەمانی ئی مادە گورجەو بوود.
عادل لە باوەت ئاسایش لە ناوچەیل ١٤٠ وت: فرە لە دانشتگەیل ئەو ناوچەیلە هانە رەوش ئاسایش نائارم و وەردەوامی تەعریبکردن و هەڕەشە، و بایەتە کۆتایی وەیە باێد.
قسەکەر حکومەت هەرێم کوردستان وتیش: یانە باوەتەیل سەرکیین ک حکومەت هەرێم کوردستان داوا لە لایەنەیل سیاسی کوردستانی کەێد بوونە ناووک گفتوگۆی وەرد حکومەت هاتگ عراق.
