حکومەت هەرێم بڕیار دەێد قەزایل زاخۆ و سۆران بکەێدە دوو ئیدارەی سەروەخوەیی
شەفەق نیوز/ ئەنجومەن وەزیران هەرێم کوردستان، ئمڕوو چوارشەممە، وە سەرۆکایەتی مەسرور بارزانی سەرۆک ئەنجومەن وەزیرەیل و ئامادەبوون قوباد تاڵەبانی جیگری دانیشتن هەفتانەی ئەنجام دا.
لە بەش یەکەم کۆبونەوەگە، سەرۆک وەزیران و جیگر سەرۆک ئەنجومەن وەزیرەیل رووشنایی خستنە بان تەقەلایل حکومەت هەرێم ئەرا دووارە رێکخستن داهاتەیل ناوخۆیی.
لە بەش دوویەم کۆبونەوەگە، سامان بەرزنجی وەزیر تەندروسی راپۆرتیگ دەربارەی رەوش تەندروسی و زیایبوینە گەورەی تووشهاتنەیل ڤایڕۆس کۆڕۆنا و بەرزەوبوین رێژەی مردنەیل و ریکارەیل نواگردن پەتاگە لە هەرێم کوردستان خستە وەردەس، و لە رووشنایی ئەوە، ئەنجومەن جەخت لە گرنگی جیوەجیکردن ریکارەیل مقەیەتیکردن لەلایەن دەسەی دژوە کۆڕۆنا کرد وەو شیوەگ مقەیەتی رەوش ژیان و گوزەرانی خەڵکەگە و سەڵامتییان بکەێد.
دویای ئەوە، سەرۆک ئەنجومەن وەزیران پێشنیاریگ خستە وەردەس وە ئاڵشتکردن قەزایل سۆران و زاخۆ ئەرا ئیدارەیلیگ سەروەخوەیی، وتیش؛ قەزای سۆران و زاخۆ دوو ناوچەی گەورە و گرنگن، و ئاڵشتکردنیان ئەرا دوو ئیدارەی سەروەخوەیی ئاسانکاریەیل فرەیگ ئەرا خەڵک دوو ناوچەگە کەێد.
لەلای خوەییش ڕێبەر ئەحمەد وەزیر ناوخۆ باس لە بنەمای یاسایی و ئیداری ئاڵشتکردن سۆران و زاخۆ ئەرا دوو ئیدارەی سەروەخوەیی کرد.
دەیلی ئەوە، ئەنجومەن وەزیران دەنگ وە دروسکردن دوو ئیدارەی سەروەخوەیی لە سۆران و زاخۆ دا، و رینما وە وەزارت ناوخۆ و وەزارەتەیل پەیوەندار وە ریکارەیل یاسایی و ئیداری ئەرا جیوەجیکردن بڕیار ئەنجومەن وەزیرەیل دریا.
