جەژن نەورووز.. وەردەوامی ئاهەنگەیل لە خانەقین و هوشداری لە ناوچەیل مەرگ و مین
حەشد شەعبی ئاهەنگیل خانەقین ئارام کەێد
محمد تمیمی سەرکردە لە حەشد شەعبی ئەرا ئاژانس شەفەق نیوز وت: کەرتەیل حەشد شەعبی دەسکردنە پلانیگ لە دەورگرد قەزای خانەقین و ناوچە دویرەیل ک لە ساڵەیل گوزەشتە پەلامار لە گورجی داعش لەناویان بوی.
تمیمی وتیش: ٣ لیوا لە حەشد شەعبی وەشکینیگ وەرجە جەژن نەورووز لە نزیکەی ١٨ ئاوای لە دەورگرد خانەقین جیوەجی کردن، ئەرا ئارامکردن ئەو شوینەیلە ک مەردم لە جەژن نەورووز ئەرای چن، وتیش: هویچ رویداویگ ئەمنی لەناو ئاهەنگەیل توومار نەکریاگە.
تمیمی وتیش: دەوریەیل چەسپیاگ هەس و دەوریەیل جویلەکەر و رەوانگەکردن وەردەوام وە کامیرا و فڕۆکەی بیفڕۆکەوان لە دەورگرد ناوچەیل گردەوبوین مەردم هەس.
کڕەیل سووریگ لە ئاو حەمرین
هەرلیوا، ئەحمەد سامر زەڕگووش وەڕیەوبەر ناحیەی سەعدیە هوشداری لە رەدکردن کڕە ئارامەیل لە دەریاچەی حەمرین وەلایەن گەشتیارەیل کرد، تا نەکەفنە وەر رفیان یا ئامانجکردن وەلایەن چەتەیل داعش، ک مینەی نێچیر وڵیگ کەن.
زەڕگووش لە قسەیلی ئەرا ئاژانس شەفەق نیوز وتیش: فرەی دەورگرد دەریاچەی حەمرین هانە ژیر چەودیاریکردن لەناو سنووریگ دیاریکریاگ ئەرا مەردم و گەشتیارەیل، وەلێ رەدبوین لەو کڕەیلە ک رەسێدە سنوور باکوور خوەرهەڵات پارێزگاگە، و پابەندنەوین وە رینمایل ئەمنی گەشتیارەیل خەێدە وەر رخ مەرگ یا رفیان.
ناوچەیل سەوز میندار
لە قەزای مەنەلی و ناحیەی قەزانیە، دەسەڵاتەیل ئەمنی چەن شوینیگ قەیەغە دیاری کردن چوینکە مین و جیماگەیل جەنگ عراق و ئیران هاناویان.
مازن ئەکەرم وەڕیەوبەر ناحیەی قەزانیە ئەرا ئاژانس شەفەق نیوز وت: وارانە رفتەیل و لافاو جاروبار ناوچەیلیگ سنووری پڕ لە مین و جیماگەیل جەنگ ک نەتەقیانە، کردە شوینەیل سەوزیگ ک هیلێد گەشتیارەیل وەناوی بچن، وەلێ رخ مینەیل ری لەوە گرێد.
ئەکرەم وتیش: دەزگایل ئەمنی و حکومەتی نشانەیل هوشداری لە شوین مینەیل و ئەو شوینەیلە دانان ک گومان لەلیان هەس، ئەرا مقیەتیکردن خەڵکەگە لە رخەیل مەرگبار، و دووپات کرد ک کەشوهەوای نەورروز وەشیوەی خاسیگ لە ناوچەیل قەزای مەنەلی وەڕیەو چوود، وەبی هویچ رویداویگ.
