تورکیا ئویشێد: هەرێم کوردستان زویترین و یەکەمین لایەن بوی رەسیە هانامان لە زەویلەرزەگە
ئەوەیش لە کۆنگرەیگ رووژنامەوانی وەلایەن یاقوت وەگەرد موسا ئەحمەد سەرۆک دامەزراو خێرخوازی بارزانی لە شار هەولێر.
قونسوڵ تورکیا وتیش: وڵاتەگەی کەفنە وەر کارەساتەیل گەورە و نەهامەتی ک زیاتر لە ٤٣ هەزار هاووڵاتی گیانیان لەدەس دان، و زیاتر لە ١٠٨ هەزار کەسیش لەناویان زەخمدار بوین.
وتیش: زیاتر لە ١٠٠ دەوڵەت کەس دەسمیەتی ئەرا تورکیا دڕا کردن، وایش؛ زویترین و یەکەمین لایەن ک رەسیە هاوار هاناڕەسین وڵاتەگی خوەی حکومەت و گەل هەرێم کوردستان بوی.
یاقوت سوپاس خوەی ئەرا دامەزراو خێرخوازی بارزانی نشان دا، لەبان ئەو دەسمیەتیەیلە ک پیشکەش کرد، چ لە کلکردن هاوکاری یا لە کلکردن تیمەیل رزگارکردن، یا دەسمیەتیەیل هاناڕەسین، وتیش؛ دامەزراوەگە لەی کاریە وەردەوامە، و ئیمە ئامادەیمن گشت ئاسانکارییگ ئەرایان جیوەجی بکەیمن.
لەلای خوەییش، موسا ئەحمەد سەرۆک دامەزراو خێرخوازی بارزانی لەناو کۆنگرەگە وت: تیم دامەزراوەگە وە بەشداری تیمەیل هاناڕەسین لە وەزارەت تەندروسی و ناوخۆ لە هەرێم کوردستان وەگەرد بڕیگ لە کۆمپانیایل، و هەمیش ریخریاگ مانگ سوور عراقی، بەشداری لە دەسمیەتیداین کردیمن جویر ئەرکیگ لەبان گەردنمان لە پیشکەشکردن خزمەتەیلیگ ئەرا زەرەدمەنەیل زەویلەرزەگە.
دیاری کرد ک کارەیل دامەزراوەگە وە سێ گام بوی، لەلیان رەسانن دەسمیەتی کوتپڕ و تیمەیلمان ئی گامە تەواو کردن، و ئیرنگە ها دابینکردن ماوا ئەرا زەرەدمەنەیل چ وە چادر یا وە کەرەڤان، و ئارەزوو دامەزراوەگە لە بەشداریکردن لە گام بیناکردنیش وەگورەی توانای نشان دا.
ئەحمەد داوا لە حکومەت تورکیا کرد وەردەوام بوود لە هاوکاریکردن وەرد دامەزراوەگە ئەرا رەسانن دەسمیەتیەیلیگ زیاتر وەرەو عەفرین و جندریس لە سوریا، لەپشت ئەو ویرانیە ک کەفتە بان ئەو دوو شارە و خەڵکەگەیان.
