تورکیا لە وەختیگ ئۆجەلان ئاگربەسی راگەیانیە تا ئیسە 14 پەلامار وەبان هەرێم کوردستان جیوەجی کردگە

شەفەق نیوز/ ریخریاگ "CPT" ئەمریکی، ئمڕوو جمعە، خەوەردا کە تورکیا لەماوەی هەفت رووژ گوزەشتە، 14 پەلامار وەبان ناوچەیلیگ لە هەرێم کوردستان جیوەجی کردگە، لە وەختیگ عەبدولڵا ئۆجەلان ریبەر پەکەکە ئاگربەسی راگەیانیە.

وەگورەی ئامار ئی ریخریاگە، سوپای تورکیا 14 پەلامار و بمباران لە هەرێم کوردستان جیوەجی کردگە؛ وەیجویرە: 9 پەلامار لە دهۆکر و3 لە سلێمانی، و2 لە هەولێر.

وتیش: سوپای تورکیا 6 لەو پەلامارەیلە وە تووپ جیوەجی کردگە، و5 وە فڕۆکەی جەنگی، و3 پەلامار وە هیلیکۆپتەر، لە وەختیگ جەنگاوەرەیل پەکەکە دوو گلە وەڵام ئەو پەلامارەیلە دانەسەو.

 وەگورەی ریخریایەگە، ئی پەلامارەیلە مەدەنی لەناویان نەوینە قوربانی.

 رووژ شەممەی گوزەشتە، پەکەکە ئاگربەسی راگەیانر لەبان سڵای عەبدولڵا ئۆجەلان ریبەری، ئەوەیش دویای 40 ساڵ جەنگ وەرد دەوڵەت تورکیا.