تویشهاتن وە کۆرۆنا لە راپەرین بەرزەو بوود، تەندروسیش ئەرا جەژن قوربان هوشداری دەێد
شەفەق نیوز/ تەندروسی راپەرین لە هەرێم کوردستان، ئمڕوو سێشەممە، راگەیان لە ماوەی پەنج رووژ دویایین، بەرزەوبوین رێژەی تویشهاتن وە ڤایرۆس کۆرۆنا ئەرا 35% بەرزەوبویە، وتیش؛ تا ئیسە هویچ تویشهاتنیگ وە پەتای کولێرا و تەو خوین وەربوین توومار نەکریایە.
وەریەوبەرایەتیەگە لە بەیاننامیگ رەسیە ئاژانس شەفەق نیوز وت" بارودۆخ پەتاگە جی نیگەرانییە وە تایبەت لە پەنج رووژ دویایین، ک رێژەی تویشهاتن وە ڤایرۆس کۆرۆنا رەسیە وە 35% لە وشکنینەیل رووژانە.
وتیش، "ئیدارەی راپەرین لە سەرتای بڵاوبوین پەتاگەو تا ئیسە ئی رێژەیە وە خوەی نەیە".
لەباوەت پەتای کولێرا دووپاتکرد، تا ئیسە هویچ پسایگ پۆزەتیڤ وە پەتاگە توومار نەکریایە سەرارای هەبوین شمارەیگ لە تویشهاتن وە زگچین و ئەڵاوردن.
تەندروسی راپەرین ئاشکەرا کرد، هویچ بیماریگ تەو خوین وەبوین تومارنەکریایە تائیسە، باوجی داوا لە هاوڵاتیەیل کەێد " ئاگاداربوون وە تایوەت ئەو کەسەیلە گوشت خوەن و بەشداری جەژن قوربان کەن".
