تەندروسی کوردستان ریکارەیلیگ ئەرا نواگردن گواستنەوەی بنچینە نووەگەی کۆڕۆنا بەێد
![تەندروسی کوردستان ریکارەیلیگ ئەرا نواگردن گواستنەوەی بنچینە نووەگەی کۆڕۆنا بەێد](https://media.shafaq.com/media/arcella/1613467371456.jpg)
شەفەق نیوز/ دکتۆر سامان بەرزنجی وەزیر تەندروسی هەرێم کوردستان، ئمڕوو سێشەممە، راگەیان هەماهەنگی وەگەرد وەزارت ناوخۆ ئەرا سەختەوکردن ریکارە تەندروسیەگان و کارە مقەیەتیەگان لە خاڵ و دەروازە سەرەکیەگان لەناو و دەیشت هەرێم ئەرا نواگردن گواستنەوەی بنچینە نووەگەی ڤایڕۆس کۆڕۆنا دویای بڵاوبوینی لە ناوچەو شارەگان عراق.
بەرزنجی لە کۆنگرەیگ رۆژنامەوانی ئمڕوو لە هەولێر و ئاژانس شەفەق نیوز ئامادەی بوی وت: لە نزیکەو چەودیری بنچینە نووەگەی کۆڕۆنا کەیمن، و تا ئیسە نەڕەسیەسە هەرێم کوردستان، و وتیش؛ توانای زوی ئاشکراکردنی دیریمن.
و ئاماژە کرد ک وەزارەت تەندروسی هالە ئامادەکاری ئەرا زیایکردن تاقیکردنەگان وەگەرد بەرزەوبوین ئاست تووشهاتنەگان لە هەرێم، و دیاری کرد ک ئیمەیش هایمنە پەیوەندی وەگەرد وەزارەت ناوخۆ ئەرا جیوەجیکردن ریکارەگان لە دەروازە سەرەکیەگان لە هەرێم، ئەرا نواگردن گواستەوەی ڤایرۆسەگە لەو ناوچەگان عراق وەرەو کوردستان.
وەزیرەگە جەخت کرد ک پابەندی وە ریکارە مقەیەتیەگان بایەدە لە سەرەتایی بوود، و راگەیان تۆمارکردن ١٢٨ تووشهاتن نوو وە ڤایڕۆس کۆڕۆنا لە هەرێم کوردستان لە دویاترین ٢٤ ساعەت گوزەیشتە.