تەعیبکردن وەردەوامە.. ٥٢ ئاوای لە خانەقین لە کورد چووڵ کریان
شەفەق نیوز/ وەرپرسەیلیگ کورد، ئمڕوو دووشەممە، ئاشکرا کردن ک ٥٢ ئاوای کورد لە خانەقین لە کورد چووڵ کریان، و سەدان خیزان عەرەو نفووسیان هاوردنە ناوچەیل دابڕیای لە دیالە، لە پلانەیلیگ دیموگرافی.
شێرکۆ تەوفیق وەرپرس بەش رێکخستن لە لق ١٥ی پارت دیموکراتی کوردستان لە دیالە ئەرا ئاژانس شەفەق نیوز وت: ٥٢ ئاوای کورد، ٣٦یان لە خانەقین و ئەوەکان لە ناحیەیل سەعدیە و جەلەولا و قەرەتەپە، لە کورد چووڵ کریان، و خیزانەیلیگ عەرەو لە ناوچە و پارێزگایلیگتر نانە شوینیان، ئەوەیش وە پلانیگ دیموگرافی رێکخریاگ.
تەوفیق دووپات کرد ک زیاتر لە ١٢ هەزار خیزان کورد لە ناوچەی دابڕیاگ لە دیالە دویای رویداوەیل جەنگ داعش لە ساڵ ٢٠١٤ تا ئیسە بار کردنە، وتیش: ئەو خیزانەیل کوردە لەوەر کوشتن و بڕین تیرۆر و بەدی خزمەتگوزاری وەرەو هەرێم کوردستان وناوڕاس عراق و قەزای کەلار بار کردن، و وەفرەیی لە ناحیەی ڕزگاری.
تەوفیق هەمیش وت: کارەیل تەعریبکردن دەسنابان زیاتر لە ٢٥٠٠ دۆنەم لە زەویەیل کشتوکاڵی کورد لە دەورگرد خانەقین، ک نەتەوەیلیگتر بوینە خاوەنیان، و رەخنەی تاوانن و نەمان دەسەی ململانێ ماڵداری لە خانەقین کرد، ک تەنیا دوو ساڵ دویای ٢٠٠٣ بویەێ، و بریا وەرەو بەغداد، ق وەیەکجاری نەمەنەی، هەرچەن زیاتر لە ١٧ هەزار سکاڵای ماڵداری لە خانەقین و دەورگردی بوی ک یەکلاوە نەکریا، و ڕەنج و ریکارەیل ئاڵووزیگ خوازێد.
ئەو وەرپرس سیاسیە وتیش: کورد بویە قوربانییگ گومابوی لەناوبەین کوشتن و بڕین تیرۆر و گرفتەیل مەزهەوی و خزمەتگوزاری لە ناوچەیل دابڕیاگ لە دیالە، لەبان ئەو هەمکەی هاوار و دادکردن وەردەوامە ئەرا چارەکردن گرفتەیلیان و گلەوداین ماف بریاگیان زاقتریان بیبەشکردنیان لە وەرپرسایەتی ئەمنی و ئیداری لە دیالە بیجگە پۆست "هیمایی" قایمقام خانەقین.
تەوفیق ئاشکرایش کرد ک هیزەیل کورد داوای نەخشەی رییگ ئەرا کۆتاییهاوردن وە گرفتەیل ناوچەیل دابڕیاگ لە دیالە خستنە وەردەس محمد شياع سودانی سەرۆک وەزیرەیل نوو، لەناویان گلەوخواردن پیشمەرگە ئەرا مقەیەتیکردن ناوچەگە وەهاوبەشی وەرد هیزەیل سوپا و دراوردن حەشد شەعبی لەناو شارەیل ١٤٠ و باوەت ئەمنی ناوخوەیی بیریەێدە دەس پولیس.
وتیش: لە زاقترین داوا و چارەیل ئەوەسە گلەوخواردن بارەگایل حزبی و سیاسی کورد لە گشت یەکەیل ئیداری ١٤٠ ئەرا وەدەسهاوردن هاوبەشییگ.راسی ئەرا کورد ک وە رەنجیگ کار ئەرا مقەیەتیکردن یەکێتی عراق کەێد و مقەیەتیکردن ماف و شایستەیل گشت پیکاتەیل.
هەرلیوا، وەرپرسیگ حکومەتی پایەبەرزیگ لە خانەقین، هوشداری لە وەردەوامی "پلان تەعریبکردن دیموگرافی لە خانەقین" کرد، وتیش: سەدان لە خیزانەیل عەرەو نفووسیان لە ئاوایەیل خانەقین هاوردنە ناوەند شارەگە.
ئەو سەرچەوەگە ک لەوەر کارەیلیگ ئەمنی ناو خوەی ئاشکرا نەکرد، وت: ٥٠٠ خیزان نفووسیان لە ئاوای و دەوربەرەیل هاوردنە ناوەند خانەقین هەرلە ساڵ ٢٠٢١، ئەوەیش وەڕی لیست ئەلیکترۆنی، و وەرەزامەنی وەزیر ناوخۆی عراق.
سەرچەوەگە ئەرا ئاژانس شەفەق نیوز وت: ٤٢٨٠ خیزان کورد خەڵک زیاتر لە ٢٠ ئاوای لە دەورگرد خانەقین، ئاوایەیل خوەیان هێشتنە جی، و ئەو عەرەوەیلە هاوریانە شوینیان، ک دویای رمیان رژیم سەدام بار کردن، ک جاریگتر ئەرا خانەقین گلەو خواردن تا دەس بنەنە بان زەویەیل کورد لە خانەقین.
دووپات کرد ک فەرمانگەی رەگەزنامەی خانەقین ئاسانکاری کارەیل ئی عەرەوەیلە کەن ک هاوریانە، و نفووسیان لەیرا توومار کەن، ئەوەیش وە پیچەوانەی یاسا و دەستوور، و وەرپرسایەتی ئەو پێشیلکردن یاسا خستە بان ئیدارەی خانەقین و لایەنەیل پەیوەندیدار ک کورد لە خانەقین کەێدە ئامانج.
وتیش: وەردەوامی کار تەعریبکردن وە ئاڵشتکردن کورد وە عەرەو وەشیوەیگ کەمکەم، ئەنجامەیل بانان بەدیگ دیرێد، ک ناسنامە و شیوەی نیشتەجیبوین کەێدە ئامانج.
کورد لە دیالە زیان لە هەڵمەتەێل تەعریبکردن دیموگرافی و پشتگووشخستن ئەمنی و ئیداری وەخوەی دوینێد، دویای رویداوەیل ١٦ی تەشرین یەکەم ٢٠١٧ زیایەو بوی، لە دویای ئەنجامدان ریفراندۆم سەروەخوەیی کوردستان، ک هیشت حزبەیل و هیزەیل سیاسی کورد بارەگایل خوەیان لە رخ کوشتن و بڕین بیلنە جی.
