یەکێتی باس تەعریبکردن پلانداریگ وە ئاسانکاری حکومەتی لە کەرکوک کەێد
![یەکێتی باس تەعریبکردن پلانداریگ وە ئاسانکاری حکومەتی لە کەرکوک کەێد](https://media.shafaq.com/media/arcella/1607855143662.jpg)
شەفەق نیوز/فراکسیۆن یەکێتی نیشتمانی کوردستان، ئمڕوو یەکشەممە، شەرمەزار کارەیل تەعریبکردن کرد ک رەسینە ناوچەیلیگ کورد لە پارێزگای کەرکوک دابڕیاگ.
نۆێنەرەیل کەرکوک لە یەکێتی نیشتمانی کوردستان لە ئەنجومەن نۆێنەران، ئمڕوو، سەردان ناحیەیل پەڵکانە و سەرکران کردن، دویای سکاڵایلیگ لەلایەن کشاورزە کوردەگان رەسیە پیان ک زەویلیان کەفنە وەر تاڵانکردن لەلایەن عرەوە هاتگەگان.
پەرلەمانتارەگان کۆبونەوەیگ رووژنامەوانی لە پشت سەردانەگە کردن، لەناوی داوا لە موستەفا کازمی سەرۆك ئەنجومەن وەزیران کردن دەسەیگ لە لایەنە پەیوەندیدارەگان دروس بکەێد ئەرا چارەسەرکەردن گرفتەیل زەویە کشتوکاڵیەگانیان لەناوچەیل ململانەگە.
پەرلەمانتار ڕێبوار تەها لە کۆنگرەگە ک ئاژانس شەفەق نیوز ئامادەی بوی وت: بەشیگ لە خاڵەگان روونکردنەوە ئەرا رای گشتی خوازێد، لەلیان ئی تەعریبکردن پلانکریاگەسە و وەدەسەیلیگ ناوخۆیی و لە کاریگەری بەشیگ لە دامەزراوە حکومەتیەگان.
وتیش؛ دەسوەردان لە لایەنەیلیگ سەربازی هەس وەگەرد کارەیل تەعریبکردنەگان، و ئیمە ئی کارە رەت کەیمن، و وەرجەیە خەورداریان کردیمن و ئمڕوویش دووارەی کەیمن، ک ئەرا هیچ لایەنیگ سەربازی نییە ئیجوور رەفتاریگ بکەێد، و دووپاتکرد لە گرنگی ئەوە ک بایەدە وەگەرد باوەتەیل ناوچە دابڕیایەگان وەگورەی بڕیارەکان ک لە دەسەی پەرلەمانی ئەراک جیوەجیکردن بەندەیل مادەی ١٤ لە دەستور دەرچوود رەفتار بکریەێد.