بارزانی وساڵح رێککەفن لەبان چارەسەری ناکۆکیەگان ناوبەین هەولێر وبەغداد
شەفەق نیوز/ نێچیرڤان بارزانی سەرۆک هەرێم کوردستان و بەرهەم ساڵح سەرۆک کۆمارعراق، روژ شەممە، دووپاتکردن لە چارەسەرکردن ناکۆکیەگان وباوەتە دویاخریایەگان ناوبەین هەولێر وبەغداد وەگوەری چوارچیوەی دەستوری ویاسایی ولە هاوکاری ناوبەین هەردوگ لاگە.
ئەوەیش هات لە چەوپیکەفتنگ ئەرا بارزانی و شاند یاوه‌ری وەل ساڵح لە کۆشک بەغداد، وەگورەی بەیاننامەیگ فەرمی لە سەرۆکایەتی کۆمار عراق، ک رەسیە ئاژانس شەفەق نیوز.
بەیاننامەگە وت: لەناو چەوپیکەفتنەگە دووپاتکریا لە گرنگی چارەسەرکردن باوەتە دویاخریایەگان ناوبەین حکومەت فیدڕاڵی و حکومەت هەرێم کوردستان، وەگورەی دەستور و چوارچیوە یاسایەگان، ولە ری هاوکاری وهەماهەنگی هاوبەش، وئەوەگ ماف عراقیەگان بپارێزید له یەکسانی کۆمەڵایەتی.
بەیاننامەگە هەمیش وت: باس چارەسەریەگان کریا ک پێویستە ئەرا دەرچگن لە قەیرانە داراییەگە لە وڵاتەگە، وەگەرد هاوشانی وپشتگردن گشتی ئەرا نواگردن پەتای کۆڕنا و کەمەوکردن لە بڵاوبوینی، وپشتگیری کادرە تەندروسی و ئەمنیەگان ئەرا وەدەهاوردن سەڵامەتی هاووڵاتیەیل.
نێچیرڤان بارزانی لەوەختیگ وەرین وه جیاجیا کۆبیەو وەل موستەفا کازمی سەرۆک وەزیران، ومحمد حەلبوسی سەرۆک ئەنجومەن نوێنەران ، وەگورەی دوو بەیاننامەی فەرمی.
بەیاننامەیگ لە نووسینگەی کازمی رەسیە ئاژانس شەفەق نیوز باسکرد: لە ناو کۆبونەوەگە باس باوەتەیل ناوبەین حکومەت فیدڕاڵی و حکومەت هەرێم کریا، و کارکردن ئەرا چارەسەرکردن کێشەیل وەرین وەگورەی دەستور، وە ئەوەیگ له بەرژەوەنی وڵاتەگە بوود، وەرانوەر سەختیەگان ئیسە، ک هالە روی گشت پارێزگایل وڵاتەگە.
بەیاننامەگە هەمیش وت: ک کازمی دووپات کرد لەبان گرنگی هاوکاری و پشتگردن نیشتمانی لە پێناو رەدبوین لە سەختیەگان ئیسە، وه‌تایبەت قەیرانە ئابووریەگە ک لە داوەزین نرخ نەفت جهانی هاتەدی، و پەتای کۆرۆنا بویە هووکاری.
بەیاننامەگە وتیش؛ دووپات کریا لەبان ئەوە ک سەختیەگان وەرانوەر وڵاتەگە هاوکاری گشتی خوازێد ئەرا نواگردنی و رەدبوین وە وڵاتەگە وەرەو ریە راسەگە ک وەبانیا چوود، ئەرا بونیادناین عراقیگ ئارام و یەکگردگ.
