بارزانى له‌باره‌ى قه‌رزه‌يل و پابه‌ندبوين هه‌رێم فه‌رمان ئاماده‌كردن راپۆرتيگ وه‌په‌له دا
شه‌فه‌ق نيوز/ نوسينگه‌ى سه‌رۆك حكومه‌ت هه‌رێم كوردستان ئاشكراى كرد، مه‌سرور بارزانى سه‌رۆك حكومه‌ت وه‌ڕيه‌وبه‌رايه‌ى ئداره و هه‌ماهه‌نگه گشتى قه‌رزه‌يل له ئه‌نجومه‌ن وه‌زيره‌يل راسپاردگه ئه‌را ئاماده‌كردن راپۆرتيگ وه‌په‌له له‌باره‌ى گشت قه‌رزه‌يل و پابه‌ندبوينه‌يل دارايى حكومه‌ت هه‌رێم و پيشكه‌شكردنى ئه‌را په‌رله‌مان و راى گشتى له هه‌رێم.
نوسينگه‌گه له به‌ياننامه‌يگ ئه‌را ئاژانس شه‌فه‌ق نيوز وت: له مانگه‌يل گوزه‌يشت و له بوونه‌يليگ جياجيا مه‌سرور بارزانى سه‌رۆك حكومه‌ت ئاماژه وه مه‌سه‌له‌ى قه‌رزه‌يل هه‌رێم كردگه‌و ئاشكراى كردگه به‌ش فريه‌يگ له‌و بڕه داراييه ك ئاماژه ئه‌راى ئه‌كريه‌ێد ئدخاره له مووچه‌يل و ئه‌چێده خانه‌ى پابه‌ندييل دارايى حكومه‌ت هه‌رێم و هووكاريشى ئه‌وه‌سه به‌غدا به‌ش هه‌رێم ره‌وانه ناكاو ئه‌خاده خانه‌ى پابه‌ندبوين دارايى .
باس له‌وه‌يش كرد دوياى وتار ئى دوياخر سه‌رۆك حكومه‌ته جاريگتر مه‌سه‌له‌گه كه‌فته وه‌رباس و شماره‌يگ له كه‌ش و لايه‌نه‌يل ك تائيسه بيده‌نگ بوينه، باس كردنه‌و ئاشكراكردنيگ دانه وه ئه‌وه‌گ ئه‌و قه‌رزه‌يله به‌ش فريه‌يگ له‌لى پاشه‌كه‌وت و پابه‌ندبوين داراييه‌و سه‌رۆك حكومه‌تيش سوپاس ئه‌و كه‌س و لايه‌نه‌يله كردگه وه ئه‌وه‌گ دوياجار بيده‌نگى شكاننه‌و قسه له‌و باوه‌ته‌و كردنه سه‌ربار ئه‌وه‌گ نيازيانيش چه بويه له‌و ئاشكراكردنه، ك يه‌يش ماناى ئه‌وه‌سه بايه‌سه وه شيوه‌يگ راسكانى مامڵه وه‌ل ئى مه‌سه‌له بكريه‌ێد.
جى باسه، به‌ياننامه‌گه يه‌يش ده‌رخست و وت: جوور ئه‌وه‌گ سه‌رۆك حكومه‌ت قه‌وڵ ئه‌وه داگه نه‌رم بدێ وه‌ل هاووڵاتيه‌يل، فه‌رمان راسپاردن(وه‌ڕيه‌وبه‌رايه‌تى ئداره و هه‌ماهه‌نگى گشتى قه‌رزه‌يل له ئه‌نجومه‌ن وه‌زيره‌يل)داگه ئه‌را ئاماده‌كردن راپۆريگ وه‌په‌له له‌باره‌ى قه‌رزه‌يل و پابه‌ندبوينه‌يل دارايى حكومه‌ت هه‌رێم له‌وه‌ر خاتر پيشكه‌شكردنى ئه‌را په‌رله‌مان كوردستان و راى گشتى له هه‌رێم.
