بەغداد و هەولێر لەبان رێککەفتن دووارە هەناردەکردن نەفت کورد واژوو کەن
سەرچەوەیگ سیاسی ئەرا ئاژانس شەفەق نیوز وت: رێککەفتنیگ لەباوەت هەناردەی نەفت هەرێم کوردستان لەناوبەین محمد شیاع سودانی سەرۆک وەزیرەیل عراق و مەسرور بارزانی سەرۆک حکومەت هەرێم کوردستان واژوو کریا.
سەرچەوەگە دیاری کرد ک رێککەفتنەگە پۆست جیگر وەڕیەوبەر گشتی کۆمپانیای سۆمۆ دەێدە کورد.
لەلای خوەییش، محمد شیاع سودانی سەرۆک وەزیرەیل فیدڕاڵ لە کۆنگرەیگ رووژنامەوانی وەگەرد بارزانی لە بەغداد وت: وسیان نەفت هەرێم کوردستان کاریگەری بەدیگ لەبان عراق داشت، و دووپات کرد ک کار ئەرا ئامادەکردن یاسای نەفت و گاز کەیمن، تا بکریەێدە یاسا.
شەوەکی ئمڕوو، مەسرور بارزانی سەرۆک حکومەت هەرێم کوردستان، وەیاوەری شاندیگ پایەبەرز لە حکومەت هەرێم کوردستان رەسیە بەغداد.
وەگەرد رەسین بارزانی، وەگەرد سودانی گردەو بوی، و باس چارەکردن گرفتەیل ناوبەین هەرێم کوردستان و حکومەت فیدڕاڵی کریا، وەتایبەت گامەیل کۆتایی ئەرا رێککەفتن لەبان باوەت نەفت و دووارە هەناردەکردن نەفت هەرێم کوردستان.
لەو مەوقەیش، ئاژانس رۆیتەرز لە زوان سەرچەوەیلیگ فەرمی وت: حکومەت عراق و حکومەت هەرێم کە رەسینە رێککەفتنیگ یەکلایی ئەرا دووارە هەناردەکردن نەفت.
وەرپرسیگ حکومەتی لە بەغداد وت: داوایگ فەرمی ئەرا تورکیا کل کریا، وە دووارە هەناردەکردن نەفت وە لویلەی جیهان، و ئەوەسا لەی ساعەتەیل کەمە دووارە هەناردە کریەێد.
