بەیاننامەی سەرۆک هەرێم لە ساڵیاد ئەنفالکردن بارزانییەیل
شەفەق نیوز/ نێچیروان بارزانی سەرۆک هەرێم کوردستان، ئمڕوو شەممە، بەیاننامەیگ وە بۆنەی رەدبوین ٣٨ ساڵ لەبان ئەو ئەنفالە ک رەسیە بارزانییەیل دەرکرد، و جەخت کرد ک مقەیەتیکردن دەسکەفتەیل گەل کوردستان خوەی تەنیا رییگە ئەرا دووارە نەوین کارەسات و نەهامەتی.
سەرۆک بارزانی لە بەیاننامەیگ لەی بۆنە وت: لە سی و هەشتەمین ساڵیاد ئەو ئەنفالە ک رەسیە بارزانییەیل، سەر رێز و نەوانزش ئەرا گیان پاک هەیشت هەزار کەس بیگوناه لە کوردستانییلە چەمنیمن، ک لە هەڵمەت دەسگیرکردن هەڕەمەکی لە شەوەکی ٣١ تەمووز ١٩٨٣، وە زوور دەرکریان و لەناو خیزان و فەرزەنەیلیان وە زوور چەک بریان و گلەو نەخواردن.
وتیش؛ جینۆساید بارزانییەیل وەبردن پیاوەیلیان وەرەو بیاوانەیل تاریک مەرگ تەواو نەوی، ک دویای ئەوە ژن و دوێەت و داڵگەیل بارزانیبەیل کەفتنە وەر چارەنووس سەخت و نادیاریگ، تا بوونە باوگ و باپیر و برا ئەرا هەزاران لەو مناڵەیلە ک باوگەیلیان لەدەس دانە، و رەنجەیل گەورەیگ دان تا تیکە نانیان پەیا بکەن و ئیوەت و پەروەردەی ئەو مناڵەیلە بیەن، و بکەفنە ناو ژیان تاڵ و سەختیگ پڕ لە ئەسر و خەفەت.
سەرۆک هەرێم کوردستان وتیش؛ لەی ساڵیاد دڵتەزنە سڵاو لە گیان پاک ئەنفال کریایەیل بارزاننیەیل و گشت ئەنفالکریایەیل و شەهیدەیل کوردستان کەیمن، و وەرێز و گەورەیی یادیان کەیمن، و وەرێز و گەورەیی نووڕیمنە رەنج و تەقەلای داڵگ و ژن و خوەشکەیلیان، سوپاس و رێز ئەرا خەڵک بەڕێز لە هەولێر و حەریر و باتاس و گشت ئەوانەگ لە دویای ئەنفالەگە گشت مینەتیگ گیشان تا دەسمیەتی خیزانەیل ئەنفالییەیلە بکەن.
هەمیش وت: دووپات ئەرا کەسوکارەیل ئەنفالکریایەیل و شەهیدەیل کەیمن ک ئیمە قەت کەموکوڕی نێکەیمن، و ئەوەسا گشت تەقەلایگ ئەرا بەڵگەکردن کەیمن تا واژوو لەبان گشت ئۆپراسیۆنەیل ئەنفال وە جینۆساید لە ئاست ناودەوڵەتی بکریەێد، و تا جاریگ تر گەل کوردستان و مرۆیی نەکەفێدە ئیجوور کەلەمەیگ، و هەمیش داوا لە حکومەت فیدڕاڵی عراق کەیمن قەربوو قوربانیەیل بکەێد.
سەرۆک بارزانی جەخت کرد دووارە دووپات کەیمن ک مقەیەتیکردن دەسکەفتەیل گەل کوردستان تەنیا رییگە تا ئەو کارەسات و نەهامەتییەیلە دووارەو نەوون، و ئەوەیش لەڕی یەکڕزی لەناونی گشت لایەن و پێگهاتەیل کوردستان کریەێد.
