بیگانەیل لەناو وڵات خوەیان.. دیالە کەمەوبوین لە کوردەیل پارێزگاگە تۆمار کەێد
شەفەق نیوز/ وەرپرسیگ سیاسی کورد لە دیالە، ئمڕوو سێشەممە، دووپاتکرد لە کەمەوبوین رێژەی کوردەیل لەناوچە دابڕیایەیل ئەرا زیاتر لە ٨٠%، لەوەر خراوی رەوشە ئەمنیەیلە و خزمەتگوزاری و پشتگووشختن نەتەوەیی، وهووشداری لە بەیبەشکردن کورد کرد لە بەشداریکردن هەڵبژاردن لەو ناوچەیلە، یا دەسکاریکردن دەنگەیلیان.
عەباس مەحمود ئەندام ناوەند رێکخستن یەکێتی نیشتمانی کوردستان ئەرا ئاژانس شەفەق نیوز وت: رێژەی کوردەیل لە ناحیەیل سەعدیە و جەلەولا و قەرەتەپە و مەنەلی وئاوایەیل خانەقین ئەرا ٨٠% کەمەو بوی، ووەرێژەی ١٥% لەناو قەزای خانەقین کەمەو بوی، ئەوەیش لەوەر خراوبوین ئاسایش و خزمەتگوزاری لەو ناوچەیلە وەگەرد پشتگووشخستن نەتەوەیی و تەقەلای تەعریبکردن ئەو ناوچەیلە.
مەحمود دیاری کرد ک رێژەی کوردەیل لە ناوچە دابڕیایەیل دیالە هالە ناونی ٤٠ – ٦٠%، باوجی پلانەیل دیمۆگڕاڤی لە دویای رمانن رژیم وەرین وە دریژی ساڵەیل گوزەیشتە هیشتن فرەی خیزانەیل کورد لەناوچەیل جوەیان وەرەو ناوچەیل هەرێم کوردستان و پارێزگایلیگ تر دەربجن، ونشان دا ک هیمان رەوشەیل ناوچە دابڕیایلە لە دیالەکەفتیەسە ژیر بەشیگ لە ئارەزووەیل سیاسی و نەتەوەییو وتیش: پشتگووشخستن ئاشکرایگ ئەرا کورد هەس.
باس ئەوەیس کرد ک نەمان هاوسەنگی ئیداری و ئەمنی لەو ناوچەیلە نا ئومیدییگ جەماوەری لەلای کوردەیل پەیا کرد، وهەست وەبیگانەیی لەناو ناوچە ووڵاتەیل خوەیان کەن.
ئەندام یەکێتی ئاشکرای رخەیلیگ لە ریگریەیلگ زانابوونی کرد ئەرا نواگردن کورد لە رووژ دەنگدان. ومەزەنە کرد ک شایەت لەو ریگریەیلە ئەوە بوود ک ریەیل بووسن یا ریکارەیلیگ لەنوای رەسینیان ئەرا بنکەیل دەنگدانەیل لە ناوچە دابڕیایەیلە بکەن، وەگەر نیگەرانی گەورەیگ لە دەسکاریکردن دەنگ کوردەیل.
