ئاماریگ شۆککەر لە تونوتیژی وەرانوەر وە پیاو لە هەرێم کوردستان
شەفەق نیوز/ یەکیتی پیاوەیل کوردستان، ئمڕوو جومعە، شمارەی ئەو سکاڵایەیلە راگەیان ک لە ئەنجام تونوتیژی وەرانوەر وە پیاوەیل لەماوەی چەن مانگ گوزەشتەی ئمساڵ توومارکریایە.
بورهان عەلی فەرەج سەرۆک یەکێتیەگە لە بەیانیگ وە ئاژانس شەفەق نیوز وت،"لەماوەی 2022/1/1 تا 2022/10/1، 387 سکاڵای تونوتیژی وەرانوەر وە پیاو لەناوچەیل جیاواز هەرێم کوردستان توومار کریایە.
وتیش،" لەوماوە 39 خوەیکوشتن پیاو توومارکریایە، و 4 پسای کوشتن وەلایەن ژنەیل یا وە دەسمیەتی ژن"، دووپاتکرد" ئامارەیل ئی ماوەی لە ئمساڵ وە بەراود وە ئامارەیل هەمانوەخت لە ساڵ گوزەشتە جیاوازی نەیرێد، وەچەو پارەکە سکاڵا و دیاردەی تونوتیژی کەمەو نەویە".
بورهان لەباوەت هووکارەیل زیایبوین تونوتیژی دژ پیاوەیل لە کوردستان وت: بارودۆخ ئابووری وناجیگیری سیاسی و جیوەجی نەکردن یاسا وەشیوەی خەسیگ لەناو کۆمەڵگە هووکارن ئەرا زیایبوین دیاردەی تونوتیژی لە ناو خیزان کوردی لە کوردستان.
لەباوەت جویرەیل تونوتیژی ک پیاوەیل رویوەروی بوون لە کوردستان سرۆک یەکێتی پیاوان کوردستان ئاشکەرایکەد،" دوو جویر تونوتیژی هەس، یەکەمیان لەشی ودویەم دەروینی، لە گشت شوینیگ لە جەهان تونوتیژی لەشی وەرانوەر وە ژن فرەترە باوجی تونوتیژی دەروینی زیاترە لە وەرانوەر پیاوەیل ک لە هەڵقورتانن کەسوکار ژنەگە لە ژیان خێزانیان و فرە داوای جیابوین وە لایەن ژنەیل خوەی دوینێد، وەگەردیاسایەیل پەیوەنیدار وە دۆسیەی زەواج و لە گرنگترینیان لە ئەستۆگردن ئیوەت زاڕوو و خەرج مانگانە.
لەباوەت دەرکردن پیاوەیل لە ماڵ، بورهان وت:" دویرەوخیتن پیاوەیل لە ماڵ دوو جویرە، یەکەمیان پیاوەیل تەمەن مامناوەنە وە تایبەت وەختیگ گێچەڵەیل خیزانی زیایەوبوود لەناو خیزانەگە ئەگەر دەرکردن پیاوەیل لەماڵ زیایترە، باوجی دویەم جویر پیاوەیل وەتەمەن چگن هەنای خیزانەگە ناکۆکی کەفێدە ناویان لە باوەت ئیوەتکردن پیاو وە تەمەن".
