ئاشکراکردن سەرەتایی ئەرا ئەنجامەیل هەڵوژاردن پەرلەمان کوردستان

شەفەق نیوز/ قسەکەر کۆمسیۆن هەڵوژاردن لە عراق، راگەیان کە ئیوارەی ئمڕوو دووشەممە کۆنگرەیگ رووژنامەوانی ئەرا ئاشکراکردن ئەنجام بەرایی هەڵوژاردن پەرلەمان کوردستان ئەنجام دریەێد.

جومانە ئەلغەلای ئەرا ئاژانس شەفەق نیوز وت: کۆنگرەگە لە ساعەت پەنج دویای نیمەڕو لە بەغدای پایتەخت وەڕیەو چوود.

لەو چوارچیوە، سەرچەوەیگ ئاگادار، ئەرا ئاژانس شەفەق نیوز باس دویاترین ئامار ئەنجامە چەوەڕیکریایل دویای لەیەکەوکردن سەرەتای دەنگەیل کرد.

 سەرچەوەگە وت: ئەنجامەیل دەسنیشان ئەوە کەن کە پارتی دیموکرات ٤٠ کورسی وەدەسهاوردیە، یەکێتی نیشتمانی ٢٣ کورسی، بزووتنەوەی نەوەی نوێ ١٦ کورسی، یەکگرتووی ئیسلامی ٧ کورسی، کۆمەڵەی دادپەروەری ٣ کورسی، بەرەی گەل دوو کورسی، و بزووتنەوەی گۆڕان یەک کورسی وەدەس هاوردیە.

 جی باسە کە ئی ئەنجامەیلە سەرەتایین و هاتێ وەگەرد وەردەوامبوین پرۆسەی سکرینکردنەگە ئاڵشت بوون.

 ئیوارەی دویەکە یەکشەممە، ئاژانس شەفەق نیوز ئەنجام شماردن بەرایی هەڵوژاردن پەرلەمان کوردستان وەدەسی کەفت کە دەرخستن پارتی دیموکرات زیاتر لە ٤٠ کورسی لە بڕ ١٠٠ کورسی وەدەس تیەرێد، یەکێتی نیشتیمانی زیاتر لە ٢٠ کورسی  و نەوەی نوێ نزیکەی ١٧ کورسی.

 لە هەولێر پارتی دیموکرات زیاتر لە 253 هەزار دەنگ وەدەس هاورد، کێبڕکییگ گەورە ناوەین یەکێتی نیشتمانی و بزووتنەوەی نەوەی نوێ بوی و هەریەکەیان نزیکەی 80 هەزار دەنگ هاورد.

 لە شار دهۆکیش پارت دێموکرات وە ٢٧٠ هەزار دەنگ لە پیشەنگی بوی، نەوەی نوێ و یەکگرتووی ئیسلامیش هەریەکیان وە نزیکەی ٣٠ هەزار دەنگ لەبان پلەی دویەم بوین.

 لە سلێمانی یەکێتی نیشتمانی نزیکەی 190 هەزار دەنگ هاورد، نەوەی نوێ زیاتر لە 110 هەزار دەنگ، پارتی دیموکراتیش زیاتر لە 45 هەزار دەنگ هاورد.

 لە هەڵەبجە یەکێتی نیشتمانی زیاتر لە نۆ هەزار دەنگ هاورد، یەکگرتووی ئیسلامی زیاتر لە شەش هەزار دەنگ، پارتی دیموکراتیش زیاتر لە چوار هەزار دەنگ هاورد.