ئاشکراکردن چارەنویس ٦٠ پەنابەر کورد بەلەمیان وەرانوەر کناراوەیل یۆنان پەکی کەفتیە
شەفەق نیوز/ ریخریاگ لووتکە ک پەیوەندیدارە وە باوەتەیل ئاوارە وپەنابەرەیل، ئمڕوو شەممە، وت بیسەروشوینی ٦٠ پەنابەر کورد لەوەر پەککەفتنیان نزیک دوورگەیگ یۆنانی راس نییە، و دووپات کرد ک لەلای پاسەوانەیل سنوور یۆنان دەسگیر کریانە.
ریخریایەگە لە بەیاننامیگ رەسیە ئاژانس شەفەق نیوز وت: خەوەریگ بڵاو بوی ک گوایە ٦٠ پەنابەر کورد ٢٣ بەلەمی لە ١٣ی ئاب لە تورکیا وەرەو ئەوروپا روی کردنە، و لە ١٧ی ئاب بەلەمەگە پەکی کەفتیە، و دیاری کرد ک ناچار بوینە لە دوورگەی کەسیرای یۆنانی بوسیەن، و پاسەوان سنوور یۆنان دەسگیریان کردیە.
بەیاننامەگە وتیش: لەو مەوقە خەوەریگ لە بیسەروشوینی بڕیگ پەنابەر لە کەسەیل ناو ئەو بەلەمە بڵاو بویە باوجی دویای چەودیریکردن نوینەرەیل ریخریایەگە لە یۆنان دەرکەفت ک هویچ کەسیگ بیسەروشوین نییە، و گشتیان لەلای پاسەوان سنووری گیریانە.
ریخریایەگە دیاری کرد ک وەزیر پەنابەنرەیل یۆنانی دووپات کرد ک ئەو پەنابەرەیلە ک وە ماوەی دوو رووژ گوزەشتە رەسینە دوورگەی کەسیرا ئەوەسا ئەرا کەمپ بەسیاگ ئۆمیگا لیزا بریەن ک ١٥ کیلومەتر لە ئەسینای پایتەخت دویرە، و دیاری کرد ک دویای توومارکردن ناویان تا ماوەی ٤٠ رووژ مینن، ئیجا خریەنە کەمپیگ واز.
لووتکە وتیش: هەرچەن بڕیاریگ ناودەوڵەتی ئەرا گلەوداین پەنابەرەیل هەس، باوجی ریخریایەگە رەنج دەێد تا گلیان نەیەن، و دیاری کرد ک چوینکە لێکوڵینەوە وەرد پەنابەرەیل کریەێد ئەوەسە ک نیەتویەنن مۆبایل وەکار بارن تا دویای تەواوبوین لێکوڵینەوە و بردنیان ئەرا کامپیگ واز.
