گۆڤار کەمبریج تۆێژینەوەیگ لەباوەت کورد فەیلی بڵاو کەێد

گۆڤار کەمبریج تۆێژینەوەیگ لەباوەت کورد فەیلی بڵاو کەێد
2023-03-14T09:15:18+00:00
شەفەق نیوز/ ئەکادیمی کەماڵ عەزیز قەیتویلی، ئمڕوو سێشەممە، بڵاوکردن تۆێژینەوەیگ لە کارەیل بارکردن و ئەنفال و جینۆسایدکردن کوردەیل فەیلی وەزوان ئینگلیزی، وەلایەن زانکۆی کەمبریج بەریتانی راگەیان، و دیاری کرد ک یە یەکەمین تۆێژینەوەس لەباوەتەیل کورد فەیلی لەناو گۆڤاریگ ئاکادیمیای جەهانی.

کەماڵ عەزیز قەیتویلی ئەرا ئاژانس شەفەق نیوز وت: تۆێژینەوەی ئەکادیمیاییم وەناونشان: یەکەمین ئۆپراسیۆن بارکردن و ئەنفالکردن کوردەیل فەیلی لە عراق، لە گۆڤار دووارەنووڕین تۆێژینەوەیل خوەرهەڵات ناوڕاس بڵاو کریا، و دیاری کرد ک تۆێژینەوەگە وەزوان ئینگلیزی لەبان ئەنتەرنێت وەلایەن چاپخانەی زانکۆی کەمبریج لە بەریتانیا وەگورەی ئی ناونشانە بڵاو کریا:

https://doi.org/10.1017/rms.2022.22 ".

قەیتویلی وتیش: یە یەکەمین جارە ئی باوەتە لە گۆڤاریگ ئەکادیمیایی جەهانی بڵاو بکریەێد، ک لەناوی زانیاری و رویداو و چالاکیەیل وەشیوەیگ زانستی ئەکادیمیایی کریاسە بەڵگە، تا بوودە سەرچەوەیگ ئەرا تۆێژینەر و یاسازان و سیاسەتمەدارەیل لە جەهان و میژوو.

Shafaq Live
Shafaq Live