پاریس پایتەخت فەرەنسا ناو جادە و باخچەیگ وەناو پیشمەرگە نەێد
شەفق نيوز/ ئومێد خۆشناو پارێزگار هەولێر، ئمڕوو جمعە، ئاشکرا کرد کە حکومەت پاریس جادەیگ و باخچەیگ وە ناو پیشمەرگە نا، ئەرا رێزگردن لەی هیز کوردستانیە.
حکومەت هەولێر پایتەخت هەرێم کوردستان لە بەیاننامەیگ رەسیە ئاژانس شەفەق نیوز وت: خۆشناو پارێزگار لە چوارچیوەی سەردانکردن پاریس ئەرا بەشداریکردن لە ئاهەنگیل جەژن نەورووز، چەو کەفتە ئان هیدالگو کویخای پاریس، کە سڵاو و ڕێز مەسروور بارزانی سەرۆک حکومەت هەرێم کوردستان ئەرای رەسان، و سوپای لە حکومەت و گەل فەرەنسا کرد ئەرا پاڵپشتیکردن وەردەوام هەرێم کوردستان، وەتایبەت لەو وەختەیل سەختە کە فەرەنسا لەشان گەل کوردستان وسیا.
هەردوگ لایەن دووپات کردن لەبان قایمکردن و بەرزکردن پەیوەندییەیل ناوەین هەولێر و پاریس، و قویلەوکردن پەیوەندییەیل میژوویی و برادەری ناوەین فەرەنسا و هەرێم کوردستان، هەمیش باس یاداشت لەیەکفامستن دایین و سەنین ئەزموونەیل ناوەین دوو شارەگە کردن.
لەلاییگ ترەک لە دیدارەگە، باس دووارە ئامادەکردن قەڵای هەولێر کردن و دیاریکردن ماڵیگ تا بوودە جویر (ماڵ پاریس) لە هەولێر، و کویخای پاریس ئاشکرای بڕیار ناونایین باخچەیگ و جادەیگ لە هەولێر وەناو پیشمەرگە کرد، ئەرا رێزگردن لە هیزەیل پیشمەرگەی کوردستانی.
لە دیدارەگە باس ئامادەکاریەیل گردەوبوین پارێزگار و کویخایەیل فرانکفۆنی کردن، کە بڕیارە لە مانگ نیسان ئایندە لە ڤێتنام وەڕیەو بچوود، کە ئومێد خۆشناو ئامادەیی هەولێر و هەرێم کوردستان نشان دا ئەرا میوانداری گردەوبوین فرانکفۆرنی لە ساڵ ئایندە.
