پارێزگار دهۆک: شایەت قەیەغە لە هەرێم بچەسپیەێد
2021-04-06T08:17:42+00:00
شەفەق نیوز/ عەلی تەتەر پارێزگار دهۆک، ئمڕوو سێشەممە، پەنابردن دەسەی باڵای نواگردن ڤایڕۆس کۆڕۆنا لە هەرێم کوردستان ئەرا چەسپانن قەیەغەی هاتووچگن وە دویر نەزانست، ئەگەر رەوشە پەتاگە وەی شیوە وەڕیەو بچوود، و تووشهاتنەیل ڤایڕۆسەگە لە زیایکردن بوین.
تەتەر لە وتاریگ ئەرا رووژنامەنووسەیل وت: ئەرا مقەیەتیکردن سەڵامەتی ھاوڵاتییەیل هەر بڕیاریگ شایەت دەرچوود، وتیش؛ ئەگەر رەوشە تەندروسیەگە وەی شیوە وەردەوام بوود، بی گومان پەنا وەو پەسەنە بریەێد.
وتیش؛ خوەشبەختانە ک هاووڵاتیەیل دهۆک هاوکارن وپابەندن لە جیوەجیکردن ریکارە تەندروسیەکان، و داوا لە دانیشتوەیل کرد وەگەرد دەسەڵاتەیل هاوکار بوون و وەردەوام بوون لە پابەندی وە ریاکرە مقەیەتیەکان تا ناچار وە چەسپانن ریکارەیل سەختتر نەویمن.
