چه‌كداره‌يليگ له داعش په‌لامار ماڵ جيگر پاريزگار سه‌ڵاحه‌دين دان
2020-06-13T10:04:40+00:00
شه‌فه‌ق نيوز/ سه‌رچه‌وه‌يگ ئه‌منى له سه‌ڵاحه‌دين، باس له‌وه كرد دويه‌شه‌و ديره وه‌ختيگ ماڵ ئسماعيل هه‌لوب جيگر يه‌كه‌م پاريزگار كه‌فته‌سه وه‌ر په‌لامار چه‌كدارى.
سه‌رچه‌وه‌گه ئه‌را ئاژانس شه‌فه‌ق نيوز وت: چه‌كداره‌يليگ له ريكخرياگ تيرۆريستى داعش وه چه‌ك سووك و قه‌ناس له ناوچه‌ى ئه‌لعه‌زبه له ده‌ورگرد ناحيه‌ى ئسحاقى له باشوور خوه‌رهه‌ڵات پاريزگاگه په‌لامار ماڵ ئسماعيل هه‌لوب جيگر يه‌كه‌م پاريزگار سه‌ڵاحه‌دين دانه.
سه‌رچه‌وه‌گه هه‌ميش وت: ئه‌و په‌لاماره ئه‌را كه‌متر له سه‌عاتيگ وه‌رده‌وام بويه‌و يه‌كيگ له پاسه‌وانه‌يلى زه‌خمدار بويه‌و چه‌كداره‌يليش واينه وه‌ره‌و شوونيگ ناديار و دوياخريش هيزه‌يل ئه‌منى ره‌سينه‌سه شوون رويداگه‌گه‌و ده‌سكردنه‌سه هه‌ڵمه‌تيگ گه‌ردين و وشكانن له‌شوون ئه‌و چه‌كداره‌يل داعشه.
