"چه‌ته‌يل كرايه‌چێ" له عراق بڵاو بوينه‌و وه‌رپرسيگيش باسيان ئه‌كا
شه‌فه‌ق نيوز/ له‌ى ماوى دوياخره له به‌غداى پايته‌خت و چه‌ن پاريزگايگ تر عراقى چالاكيه‌يليگ ئاشكرايگ كه‌فێده وه‌رچه‌و له‌باره‌ى "چه‌ته‌يل كرايه" جوور ئه‌وه‌گ باس له‌لێ ئه‌كريه‌ێد ك تاوان جياجيا ئه‌نجام ئه‌يه‌ن وه‌رانوه‌ر وه‌رگرتن بڕيگ پويل، ك يه‌يش مه‌ترسى گه‌ورايگ له‌بان كۆمه‌ڵگاى عراقى دروس ئه‌كا.
له‌ى باوه‌ته‌و، وه‌رپرسيگ ئه‌را ئه‌لعه‌ره‌بى ئه‌لجديد ك نه‌تواس ناوى ئاشكرا بدێ، ئه‌وه ده‌رخست ك چالاكيه‌يل ئاشكرايگ له‌لايه‌ن ئه‌و چه‌ته‌يل كرايه‌چيه له‌ى ماوه‌ى دوياخره ئه‌نجام گرتگه‌و ئاماژه وه‌يه‌يش كرد ئه‌و چه‌ته‌يله له زوورم پاريزگايه‌يل كار ئه‌كه‌ن وه‌تايبه‌ت له به‌غداى پايته‌خت بيجگه پاريزگايه‌يليگ تر باشوور.
وه‌رپرسه‌گه وت: هويچ ئاماريگ فه‌رمى له‌باره‌ى شماره‌ى ئه‌و چه‌ته‌يله‌و شماره‌ى تاوانه‌يليان له‌وه‌رده‌س نيه، وه‌لێ چالاكيه‌يليان له‌ى ماوه‌ى دوياخره به‌رزه‌و بويه وه‌ل تۆماركردن روێداگه‌يل وه‌شيوه‌يگ رووژانه‌و باس له‌وه‌يش كرد لايه‌نه‌يل ئه‌منى چه‌وديرييان ئه‌كاو تويه‌نستگه شماره‌يگ له‌ليان ده‌سگير بكاو هه‌واڵه‌ى په‌يجوورييان كردگه‌و بڕيگ له‌ليان بڕياره له‌سێداره‌داينيش له‌بانيان ده‌رچيه.
